Palasyo sa batan-ong Hari
SA UNANG panahon adunay hari nga nanag-iya sa tibuok bahandi sa iyang suok sa kalibutan. Giminyuan niya ang pinaka matahom nga rayna sa iyang panan-aw ug nagpuyo sila nga malinawon sa gingharian nga gialirungan sa pito ka abunda nga sapa.
Tungod sa gasa gikan kang Allah, ang makagagahom sa tanan, ang iyang asawa mihimugso sa ilang una ug bugtong anak nga lalake, ug isip kabilin sa iyang pinalanggang liwat (kay kahibalo siya nga ang kinabuhi nga tawhanon dili gayud molungtad og dugay), gimanduan niya ang iyang mga ulipon sa pagtukod og palasyo alang sa iyang sumusunod. Usa ka palasyo nga ang kalapad ug ang kahabog dili nato mahimo nga mahanduraw.
“Halayo sa salimuang ug kabuang sa kalibutan, ang akong liwat kinahanglan dili makasaksi bisan sa kabugnaw nga idalit sa luspad nga buwan ug sa kapintas sa kainit sa bidlisiw sa adlaw,” tugon sa hari sa iyang mga sakop.
Mikaliring ang sikulo sa mga bituon, uban niini, ang hari ug rayna sama sa damgo sa tiunay nga managhigugmaay, nagdungan pagpangamatay sa katre sa katulugon.
Nabuhi man nga nag-inusara, midako ang bata nga usa ka ambungan ug lantip nga batan-ong hari. Ug usa ka adlaw dinhi sa dapit nga wala mag-ihap sa panahon, sa iyang naandan nga pagbaktas-baktas tuyok sa iyang bahin sa palasyo nakamatikod siya og buho gikan sa tipak sa bungbong nga gitapakan og mga dagkong bato.
Nadani sa kawhat sa pagka maukiton, gipatawag ug gisugo niya ang mga suluguon paglangkat niining mga batoha. Pagka human nakaplagan nila ang lawak nga tugob ang upat ka suok sa mga butang kansang unod napuno sa mga linya sa tinta (libro) ug mga tag-as nga rulyo sa ‘papyrus’ nga nabulit sa pigura (mapa).
Sa pagpakli-pakli niining mga balaan nga salin sa buok hikalimtan, mikilab ang kahiamgo sa batan-ong hari nga, tingali aduna pay kinabuhi gawas niining labirinto sa daw walay kahumanang hagdanan ug pultahan. Busa sa walay pagduha-duha misugod siya pagpanaw aron makalingkawas sa halwa nga gimugna sa iyang kaugalingong amahan. Apan ang palasyo halapad gayud kaayo. Ug tiguwang na siya dihang hingpit na siyang nakagawas niini. Sa iyang pagtukmod sa sera sa katapusang pultahan naabli kini, apan igo lang niya nga nasud-ong ang pagsubang sa bulawanon nga adlaw sa wala pa mobiya ang kahayag nga mao ang kalag sa nagkadugta nga basiyo nga mao ang lawas. Apan tan-awa, O mapinanggaong Allah, unsa katam-is ang pahiyom sa linalang nga gihikawan sa kamatuoran!