I care for only you
(Ikatulo sa pito ka mga gula)
KAMI
rang duha si Eduard ang naglingkod sa usa ka lamesa sa daplin sa among lawn. Hinapinag puting panapton ang lamesa. Samtang nangaon mi, malipayon mi nga nagtan-aw sa mga nanayaw. Dunay giabangang sounds ang akong parents aning ilang wedding anniversary party.
Mitukar ang sweet music. Mitindog si Eduard, iyang gitunol nako ang tuo niyang kamot. Nakapanglingo ko ug nahikatawa. “Shall we dance, my dear?” Gidawat ko ang kamot ni Eduard ug mitindog ko. Nagpatunga mi. Sa unang higayon, nagakos ko ni Eduard but there’s no malice nga mitungha sa akong hunahuna. Misunod ang uban sa pagbayle.
“I’m so happy now, Wilda. I think, this night is the moment of joy in my life.” “Kakorni gyud nimo, uy, Duard.” Hunghong nako. “Makakorni gyud ang gugma, Wilda.” Wa na lang ko magtingog. Nagpaanud-anod mi si Eduard sa nindot nga kanta ni Matt Monroe nga My Way.
Unya nakatan-aw ko sa lalaki nga bag-ong nahiabot, si Ronnie. Pustarawo kaayo siyang tan-awon sa gisul-ob nga puwang poloshirt nga giparesan sa itom nga karsones maong. Milutaw ang iyang kaputi. Midiretso siyag duol kanila ni Mama ug Papa, ug sa iyang mga ginikanan, nga malipayong nag-estoryahay sa usa ka lamesa, nag-inom silag Red Wine. Miamen si Ronnie sa iyang parents ug kanila ni Mama ug Papa.
Mipaingon si Ronnie sa dakong lamesa nga gibutangan sa mga pagkaon. Naniid lang ko niya.
Mikaon lang siyag gamay unya nagkuhag beer nga gipahimutang sa usa ka lamesa.
“Si Ronnie, o. Gamay ra ang gikaon unya ang beer dayon ang giatubang.” Gihunghongan ko si Eduard. Mitan-aw si Eduard sa iyang igsuon. “Mag- enjoy lang tingali siya ron, Wil. Moduyog lang tingali siya sa kamalipayon ron dinhi.”
Miyango na lang ko. Wa na ko magtingog. Namatngonan nako nga nagkahugot ang paggakos ni Eduard nako. Gitukod ko ang akong kamot sa iyang dughan. Mipahiyom na lang si Eduard. Gingislitan ko siya. “Tsansing.” Hilom kong nakaingon. Pagkahuman sa tukar, namalik mi si Eduard sa lamesa nga among nahimutangan. Nag-inom mig Red Wine. Pero dyotay ra. “Hello, Brod and to my sister.” Dako kaayog katawa si Ronnie nga miduol namo ni Eduard. Milingkod siya sa akong tupad.
“Ayaw lang lainag sabot, Wil, ang akong gisulti. Sa madugay ug sa madali, mahimo ka na man nakong igsuon.” “Aw, nindot man na, Ron. Pero di pa man mi uyab sa imong Brod.” Nakatan-aw ko kang Eduard.