FEU mosuporta ni Racela sa PBA

OPISYAL nang gipaila si Nash Racela isip labing bagong coach sa Talk N’ Text Tropang Texters alang sa 42nd Philippine Basketball Association (PBA) season.

Ang pagkatuboy ni Racela aduna na’y pagtugot gikan sa top management nga gipangulohan sa tag-iya sa TNT nga si Manny V. Pangilinan.

Ang MVP Group naghugpong niadtong Sabado sa gabii sa opisina sa PLDT sa Makati City diin gipagawas ang pinal nga desisyon nga hulipan ni Racela si coach Jong Uichico.

Mismong si Pangilinan maoy nagdumala sa panaghugpong diin naa sab si Uichico.

Si Racela nakadawat og tawag gikan sa TNT team official kabahin ning maong kalambuan human niya naagak ang Far Eastern University (FEU) Tamaraws ngadto sa kadaugan batok sa University of the Philippines (UP) Maroons , 66-63, sa UAAP Season 79.

Kasamtangan nang gi-finalize ang mga detalye sa kontrata ni Racela. Hinuon inig ka human pa sa UAAP puwedeng makapirma si Racela.

Si Uichico mobalik sa iyang tahas sa Gilas Pilipinas isip assistant ni headcoach Chot Reyes.

Sa iyang bahin, si Racela mipadayag nga iyang tiwason ang UAAP Season 79 Season isip headcoach sa Far Eastern University (FEU) human siya pormal nga gipahibawo nga maoy bag-ong coach sa TNT Ka Tropa.

Ang Spin.ph mitaho kagahapon nga si Racela ang gihatagan sa bag-ong tahas sa TNT human ang mga kadagkuan sa MVP Group nagtagbo niadtong Sabado.

Si Racela, kinsa maoy deputy coach ni Uichico, nagpakahilom lang sa dihang nabaniog nga siya ang bagong coach sa TNT, apan ang iyang FEU athletic director nga si Mark Molina ang mibutyag nga magpabilin si RacEla sa team hangtod sa katapusang bahin sa UAAP.

“Ang only concern namin at FEU is to make sure Nash will finish the season,” matod ni Molina human sa kadaugan sa Tamaraws 63-60 batok sa University of the Philippines (UP).