TUIG SA LANCERS

• UV hari sa Cesafi 2016 men's basketball • Mao usab ang kampyon sa SBP ug Passarelle division sa Milo

“IT'S heaven!” Mao kini ang dalikyat nga tubag ni University of the Visayas (UV) Green Lancers coach Gary Cortes sa pangutana kon unsa'y iyang gibati nga nalangkat nila pagbalik ang korona sa Cebu Schools Athletic Foundation Inc. (CESAFI) college men's basketball niadtong Sabado sa gabii sa Cebu Coliseum.

Ang Green Lancers ningpakyas sa defending champion University of San Carlos (USC) Warriors, 66-53, sa Game 4 aron tiklupon ang best-of-five championship series, 3-1.

Kini maoy labing unang titulo ni Cortes isip coach sa Green Lancers, usa ka obligasyon nga iyang gisugdan sa miaging tuig.

Sa kinatibuk-an, ang Green Lancers aduna na'y 11 ka mga titulo sa Cesafi. Siyam ka sunodsunod ang nahatag ni coach Elmer Cabahug ug usa kang coach Felix Belano.

Alang kang Cortes, usa kini ka tam-is nga panimalos sa Green Lancers ngadto sa Warriors nga maoy nagpakyas kanila sa finals sa miaging tuig.

“Dili ko maka-describe sa akong feeling. Basta nindot gyud ang akong gibati,” dugang ni Cortes, kinsa nakahakot sab og titulo dihang nagduwa pa kini sa Green Lancers kaniadto.

Gawas sa beteranong si Alfred Codilla, mao sab kini ang labing unang titulo nga naangkon sa tanang mga magduduwa sa Green Lancers.

Gikan sa 42-43 nga biya sa hinapos nga bahin sa 3rd quarter, ang Green Lancers ningpaulbo og 10-0 run aron pagposte og 5243 nga labaw sa sayong bahin sa 4th quarter.

Human niini, ang labing duol na lang nga nahimo sa Warriors ni coach Romel Rasmo mao ang pahakon ang labaw sa Green Lancers ngadto sa pito, 45-52.

Nagkumboya sa pagbulhot sa opensa sa Green Lancers mao sila si Codilla, Rey Suerte, Sheldon Gahi, Josue Segumpan ug Jayson Balabag.

Gipangulohan ni Suerte ang kadaugan pinaagi sa iyang 14 puntos samtang ningdugang og 11 puntos matag usa sila si Codilla ug Segumpan.

Ang Warriors gipangulohan ni Ian Tagapan pinaagi sa iyang 11 puntos samtang nihatag og siyam ka puntos matag usa sila si import Scothy Ntumba ug Kevin Oleodo.

Dobleng suwerte ang naangkon ni Suerte gumikan kay napili sab siyang MVP sa torneyo.

Gikauban ni Suerte sa Mythical Five mao ang iyang teammate nga si Jan Monic Soliva, Jaybie Mantilla sa University of San Jose Recoletos (USJ-R) Jaguars, Mark Jayven “MacMac” Tallo sa Southwestern University (SWU) Cobras ug USC rookie Conrad Catapusan.

Puntos matag usa UV (66) Suerte 14, Codilla 11, Segumpan 11, Soliva 7, Gahi 6, Balabag 6, Sackor 4, Napao 2

USC (53) Tagapan 11, Oleodo 9, Ntumba 9, Laguyo 7, Catapusan 7, Munez 3, Ecarma 3, Adlawan 2. Quarterscores: 18-18, 31-29, 5043, 66-53.