Brgy. Ginebra mopahigayon og fans day

ISIP bawos sa lunod-patay nga suporta sa ilang mga sumosunod nga tatawng nakatabang sa ilang paglangkat sa Philippine Basketball Association (PBA) Governor’s Cup title, ang Brgy. Ginebra Gin Kings nagpahigayon og thanksgiving party kagahapon sa hapon sa The Arena sa San Juan.

Gibanabanang miabot sa 3,000 ka mga sumosunod sa Brgy. Ginebra ang ningtunga diin ang uban gikatahong gikan pa sa nagkadaiyang mga probinsya. Nakadawat og libreng Tshirt ug pagkaon ang matag usa.

Ilang gitan-aw ang replay sa Game 6 sa finals batok sa Meralco Bolts ug sama gihapon sa live, ming-ugyaw ang mga abiba hilabi na dihang napasulod ni import Justin Brownlee ang nakapadaog nga puntos.

Ang tanang mga magduduwa sa Gin Kings gipaila og binagsa diin sila si Mark Caguioa, Jayjay Helterbrand, ug Brownlee ang katapusang gipangtawag. Gipaila sab ang mga sakop sa coaching staff nga gipangulohan ni Tim Cone.

Human mihatag og mensahe sa ilang mga sumosunod, ang mga magduduwa sa Gin Kings mipirma og autographs ug nagpakuha og mga hulagway. Si Helterbrand mihatag pa sa iyang itom nga Adidas nga kawo ngadto sa nangayo niini.

“That was my favorite hat,” matod ni Helterbrand. “But you know, it’s okay. It’s a small sacrifice for them just being out there at 7 o’clock in the morning, waiting in that line just to get a glimpse of their favorite players. It’s just a small token of my appreciation for them.”

Human niini, si Marge Cadiz, kinsa naila sa social media, mikanta sa iyang kaugalingong bersyon sa kanta ni Gary Granada nga “Sana Manalo ang Ginebra.”