Dengue cases sa Mandaue mitaas, 16 namatay
KASO sa dengue sa dakbayan sa Mandaue gikan Enero hangtod Oktubre 22 ning tuiga, hapit motriple ang pagtaas kompara sa samang panahon sa milbayng tuig.
Kini maoy gipaambit ni Dr. Edna Seno, sa city health office sa dakbayan atol sa gipahigayon nga
press conference kagahapon sa buntag. Base sa datos nga nakuha ning matalaan gikan Department of Health- Regional Epediomology and Surveillance Unit (RESU) nga gikan sa 350 ka mga kaso sa milabayng tuig, niabot na ngadto sa 863 ang natala nga kaso sa dakbayan ning tuiga.
“Mandaue City has a total number of cases of 863. Deaths are 16. I was calling the RESU head, 17 na daw. But what we’re trying to do, we’re trying to validate the
figures,” matod ni Seno sa mga tigbalita kagahapon. Niadtong 2015, sa 350 ka mga kaso nga natala sa Mandaue, duha niini ang namatay.
Matod ni Seno nga human nila masuta ang maong gitas-on sa mga kaso, dali silang mihimo ug beripikasyon sa mga kaso apan matod niya nga sa milabayng semana, wa nila makit-i sa city health ang 5 ka mga kaso.
Sumala pa ni Seno nga sa milabayng buwan pa sila miapelar sa mga kapitan sa barangay sa dakbayan
sa pag- activate sa mga barangay dengue brigade aron mas mapahugtan ang kampanya batok sa maong makamatay nga sakit.
“Some barangay have (dengue brigade), but some do not have. It has to be a whole year-round thing but much more intensive and massive at this time,” dugang ni Seno human sa pagtaas sa kaso.
“We appeal to all Mandauehanon, lets prevent this together. Dengue is a preventable disease. This is something we can prevent by own inititatives. We can
prevent it by making sure our area is clean,” matod ni Mayor Luigi Quisumbing sa dihang gikuhaan ug habig kabahin niini.
Paambit ni Seno nga 27 ka mga barangay sa dakbayan ang 5 ka mga hotspot nga barangay ang giila sa iyang buhatan.
Kini mao ang Paknaan, Tipolo, Subangdaku, Labogon ug Umapad.
Sumala pa ni Seno nga sagad sa ilang nakitang hinungdan sa mga kaso sa dengue ilabi na sa mga hotspot nga lugar mao ang kahugaw ug way pakabana sa kalimpiyo ang mga residente.
Gitataw ni Seno nga wa usab nagkuwang iyang buhatan kalabot sa pagtubag sa maong sakit tungod kay aduna man silay libreng contultasyon ug libreng rapid test examination sa dengue apan iyang nakitang problema mao nga di magpakonsulta ang mga nagkasakit.
Sa milbayng tuig, ikatulo ang Mandaue sa rehiyon nga may pinakataas nga kaso sa dengue apan karon niini kini ngadto sa ikaduha, nag-una mao ang Cebu City ug ikatulo ang Lapu-Lapu.
Apan pinakadaghan nga namatay mao ang sa Mandaue gikan sa Enero hangtod sa Octobre 22 nga may 16 ka nakalas nga kinabuhi, Cebu City may 14 ka mga namatay ug 10 ang namatay sa Lapu-Lapu.
LARVICIDE
Niumol ang Provincial Health Office (PHO) ug komitiba nga maoy mangita sa labing maayong kalidad nga larvicide nga paliton aron pagbatok sa sakit sa dengue, nga nisiaw lukop probinsiya.
Samtang mga dapit nga taas nga populasyon ug dunay taas nga ihap sa dengue cases ug deaths, kinahanglang mag-doble sa ilang paningkamot pagsiguro nga dili na makakatap pa ang sakit.
Wala pa makapalit ang Kapitolyo sa gitinguha nga larvicide, nga maoy gamiton pagpatay sa mga ngoyo-ngoyo aron dili na kini mahimong lamok, subay sa mas gihingusgan nga kampaniya kontra dengue.