3 K-9 dogs gipabantay sa CPDRC

GUMIKAN sa gihigpitan nga seguridad sa mga pulis nga nagbantay sa Cebu Provincial Detention and Rehabilitation Center (CPDRC) pagpalusot sa gidili nga drugas sud sa prisuhan.

Gumikan niini, regular na nga papostehan og K9 ang CPDRC aron pagsimhot sa drugas.

Si Bobby Legaspi, officersa CPDRC, nibutyag nga duha ka mga lalake ang nilabay sa shabu gikan sa gawas apan didto kini nitugpa sa atop, duol sa entrance gate diin inspeksyunon sa mga pulis ang dala nga mga pagkaon ug gamit sa mga dalaw.

Ang paagi, ang shabu giputos og papel nga gibutangan og duha ka P1 unya gilabay gikan sa gawas sa pacilidad paingon sa sulod sa duha ka mga lalake nga luwan og motorsiklo.

Nabutyag ang modus duha ka semana ang nakalabay human ang duha ka mga lalake nga nagsul-ob og mga helmet ang nanuktok sa gate ug nisulti nga mokatkat sila sa atop tungod kay dunay kuhaan.

Apan wa sila tugti sa nagbantay nga mga pulis.

Dihang nakuha na ang illegal nga kontrabando sa pulis, nakasibat na ang duha ka mga lalake sakay sa motorsiklo.

Si Legaspi niangkon nga bisan sa sunodsunod nga greyhound operation ug inspeksyon sud sa mga selda, duna gihapon silay makuha nga mga cellphone ug wa niya gilimod nga duna gihapon makalusot nga ginadili nga drugas bisan sa Tapok Hangyo (Taphang) ug Tuktok hangyo (Tukhang).

Kagahapon, gitugyan sa kagamhanan sa lalawigan sa Sugbo pinaagi ni Cebu Provincial Anti-Drug Abuse Office head Ivy Durano-Meca, ang tulo ka K9 ngadto sa Philippine Drug Enforcement Agency.

Matod ni Meca, ang provincial government maoy moabaga sa maintenance o pagkaon sa tulo ka mga iro.