PHO miawhag og tabang gikan sa pribadong sektor

MIAWHAG ang Provincial Health Office (PHO) sa pribadong sektor sa pagtabang nga masulbad ang pag-atake sa daghang langaw matag-karon-ug-unya sa lungsod sa Asturias.

Gawas sa Department of Environment and Natural Resources (DENR) ug ang kagamhanan sa Asturias, si PHO officer Dr. Rene Catan nag-awhag sa poultry farm owners ug mga apektadong residente sa pagtambong tigom nga iyang gipatawag uban sa pestcontrol companies.

Ang tigom pagahimuon karong semanaha ug naglaum si Catan nga duna nay makab-ot nga kongkreto ug long-term nga solusyon labot sa pagsiaw sa langaw, ilabi na panahon nga mang- harvest ang mga poultry farm.

Base sa obserbasyon sa PHO team nga gipadala ni Dr. Catan sa Asturias, duna lakang nga gihimo ang poultry farm aron pagpamenus sa baho ug presensiya sa langaw sa ilang operasyon apan kay dili magpareha ang ilang schedule pagharvest, busa magbalhin-balhin lang ang mga lagaw.

Sa nasayran, wa’y hunong ang pagreklamo sa residente sa nagkadaiyang barangay sa Asturias labot sa maong problema nga dugay na usab nga nagsige ug balik-alik diha sa ilang dapit.

Hinuon, wa pa’y nakaabot nga taho sa opisina ni Catan labot sa posibleng mga nataptan og sakit nunot sa presensiya sa daghang langaw sa Asturias.

Nagtuo hinuon ang PHO nga nunot sa kadaghang langaw, makamugna kini og risgo sa panglawas sa mga apektadong residente.

Sa miaging semana, gipasirhan sa lokal nga kagamhanan ang usa ka poultry farm nga maoy nakaingon sa subling pagsiaw sa mga langaw.

AZDL