Kapin sa tuig nga bata hapit malumos, kritikal

ANAA sa talandugon nga kahimtang atol ning pagsuwat ang kapin sa usa ka tuig nga batang babaye nga naglutaw nang napalgan niadtong Domingo sa hapon sa kadagatan sa Marigondon, Lapu-Lapu City.

Kasamtangan nga anaa sa Vicente Sotto Memorial Medical Center (VSMMC) si Jenelyn Sagarino, nga magduha ka tuig karong Nobiyembre 9 nga taga Sityo Marbeach, Marigondon, dakbayan sa Lapu-Lapu.

Base sa inisyal nga kasayuran nga nahipos sa kapulisan nga niadtong Domingo sa 5:45 sa hapon si Jenelyn ug ang singko anyos niyang maguwang nga lalake uban sa laing mga bata ang nagkalingaw og ligo sa baybayon.

Nilanog ang singgit sa usa ka babaye nga nangaligo sa dagat niadtong higayona ang nangayo og pakitabang kinsa maoy unang nakamatikod nga lawas sa bata ang naglutaw sa taga-tuhod nga gilawmon sa tubig.

Dali nga gitabang ang bata sa mga sakop sa Emergency Rescue Unit Foundation (ERUF) ug gidala sa pribadong tambalan sa Lapu-Lapu ug gibalhin sa VSMMC alang sa dugang paghiling sa pag-atiman sa mga mananambal.

Samtang, ang inahan sa bata nga si Irish Sagarino, 21, minyo niingon nga wa siya makabantay sa iyang mga anak nga nangaligo na sa dagat.

Sumala pa nga naglinga siya sa pag-atiman sa iyang gamay nga negosyo nga mao ang magpa-abang og salbabida ngadto sa mga nangaligo nga maoy gamiton aron nga dili malumos ang mga beach goer.

Nahibawo nalang si Sagarino nga diriyot madisgraya ang iyang anak sa dihang nagkagubot ang mga tawo sa baybayon ug sa iyang pagpanguryuso nakugang siya nga gipahibawo nga iyang anak diay ang nalumos.