Epekto sa gihimo ni Duterte

KON danyos ang hisgutan, di sab diay bintahaan ang nahimo sa bagyong Lawin nga miigo didto sa Rehiyon 1, 2, 3 ug sa Cordillera Administrative Region. Gani dunay mihulagway niini nga susama ra usab diay og gikusgon ang bagyong Lawin sa bagyong Yolanda nga dinhi usab sa Visayas Region ang naantimano og igo niadtong 2013. Ang National Disaster Risk Reduction and Management Council (NDRRMC) mibanabana nga moabot ngadto sa P2.5 bilyones ang danyos sa agrikultura ug sa inprastraktura. Mikabat ngadto sa 48,521 ka mga pamilya ang naapektohan diin 18,425 niini ang anaa pa hangtod karon sa evacuation center. Hinuon ang Department of Social Welfare and Development ( DSWD) ubos sa pagpangulo ni Secretary Judy Taguiwalo way puas sa ilang trabaho aron gyud mahatagan sa saktong panginahanglan ang mga biktima. Pero ang usa sa gikatingad-an karon mao nga wala gyuy mga hinabang gikan sa laing nasod nga nadawat ang taga DSWD. Kini dakong sukwahi sa nahitabo sa Yolanda nga dali nga gibaha sa mga donations gikan sa abroad. Dili kaha mao ni epekto sa sige’g pangataki ni Presidente Rodrigo Duterte sa mga nasod nga kaalyado sa Pilipinas? Samtang ang bagyong Lawin grabing nakakusokuso sa pipila ka mga dapit sa nasod, si Duterte didto sa China nagsige sab og pangataki sa Estados Unidos ug sa ubang mga nasod nga maoy nasentro sa mga balita. Iyang gipahibawo sa tibuok kalibutan nga iyang putlon ang pagpakig-alyado sa Pilipinas ngadto sa Estados Unidos nga nakapahupay sa China. Daghang nagsagmuyo sa gihimo sa Presidente ug kinsa mang nasura ang ganahan nga moitsa sa iyang tabang ngadto sa Pilipinas kansang lider nagsige na lang og pangaway? Di sab gani ta siguro kon porsigido ba nga motabang nato ang China tungod kay sa pag-uli ni Duterte dinhi sa Pilipinas iya na man sab nga gibakwi ang gipanulti. Sama sa US ug ubang nasod, wa kaha mahiubos usab ang China sa iyang gihimo?