Dugo pa more Tiyo Sam!

ISIRA. Kon si Cebu City Mayor Tomas Osmeña ang pabut-on iya pa gihapon palabayan sa basura ang dumpsite sa Inayawan bisan kon nilapas ni kini sa iyang edad ug ang baho nakaapekto sa mga namuyo, estudyante sa UC, ug sa mga establisamento diha sa SRP.

Apan human sa pagbisita ni DENR Sec. Gina Lopez sa Inayawan dumpsite iyang gimandoan ang DENR Region 7 nga ipasira ang dumpsite dihang iyang nakita nga moabot na didto sa dagat ug ang baho di na maantos.

Apan si Mayor Osmeña sa iyang ka istrikto ug kaisog way nahimo sa orden ni DENR Secretary Lopez. Igo na lang miingon si Mayor Tomas nga motuman siya sa balaod sa kalikupan.

Kon gisanong pa ni Mayor Tomas ang reklamo sa katawhan, sa akong tan-aw di na tingale mopasaka og sumbong si Kon. Joel Garganera ngadto sa Court of Appeals batok kaniya.

Karon, gawas nga nauwawan siya sa order ni DENR Secretary Lopez nga ipasira ang Inayawan dumpsite ug limpyohon usab kini, kinahanglan mangita usab siya og laing dapit nga malabayan sa basura sa dakbayan.

Gani, matud pa sa taho, gipagawas pa ni Mayor Tomas sa ilang pakighinabi ni Secretary Lopez nga ang mga Team Rama konsehal wa moabag kaniya sa pag-ayo sa Inayawan dumpsite. Apan nabuko si Mayor Tomas dihang nakigestorya is Lopez ni Konsehal Garganera.

Migawas nga napildi si Mayor Tomas sa iyang pakigbugno sa rason batok ni Konsehal Garganera aning isyu sa Inayawan dumpsite. Ang order ni DENR Secretary Lopez nga isira ang Inayawan dumpsite kadaugan sa tanan taga Sugbo.

Ang dakong pangutana, asa na unya ilabay ang basura kon masirhan na ang Inayawan dumpsite?

Mobalik kaha og labay ang dakbayan sa Sugbo ngadto sa Consolacion nga gitawag ni Mayor Tomas usa ka pangurakot tungod kay mahal ang bayronon sa paglabay?

Di na gani mahakot ang atong basura sa mga basurero sa sunod semana nagpasabot kini nga gisira na gyud ang dumpsite sa Inayawan.

**** GIPADUGO LANG. Samtang kusog nga mipakpak ang taga China, apan daghan ang nabukog sa pagsulti ni Presidente Duterte nga makigbuwag na siya sa Amerika atol sa iyang pakigpung atol sa iyang una nga State Visit sa China, nga primero sa usa ka Presidente sa Pilipinas.

Ang mga batabata ni Presidente Duterte nagkapuliki og esplekar ngadto sa media kon unsay ipasabot sa presidente. Ang mga opisyales sa embasiya sa Amerika naglibog sa usab sa nagkalain-lain nga polisiya nga gipanulti ni Presidente Duterte.

Apan sa pag-abot ni Presidente Duterte sa Davao city niadtong gabii sa Biyernes iyang giklaro atubangan sa media nga wa siyay katungod moputol sa Treaty sa Pilipinas ug Amerika. Ang iyang buot ipasabot nga iyang undangon ang foreign policy nga sunod-sunod lang gihapon ta sa Amerika.

Sa tinuoray lang labina sa nakasabot di na mahimo sa usa ka presidente ang pagputol sa relasyon (diplomatic ties) sa duha ka nasud nga way pagtugot gikan sa Kongreso. Gawas pa niini, daghan ang maapektohan kon mahitabo nga maputol ang relasyon sa Pilipinas ug Amerika.

Usa sa maigo kon maputol ang panagtagad sa Amerika ug Pilipinas mao ang atong ekonomiya.

Ang mga dagko nga negosyo o industriya nga nia sa atong nasud, nga nakahatag og daghan trabaho sa atong mga kaigsoonan, gikan sa Amerika.

Sus, kon matinuod nga di na mag-alayon ang Pilipinas ug Amerika ang mga luho nga Pinoy di makapalit og “tati” (US made) nga mga sinina, karsones, ug sapatos. Pero di kaayo ni problema kay ang China maayo man mangopya og mga produkto gikan sa Amerika ug Europa.

Apan bisan pa sa sige og bunal ni Presidente Duterte ni US President Obama, sa United Nation ug sa European Union, ang mga opisyales sa Amerika nagsige og pasabot nga ang nagpadayon pa gihapon ang maayong relasyon sa atong nasud ug sa Amerika.

Uyon ko sa punto ni Presidente Duterte nga angayan na nga ang atong nasud dunay independente nga foreign policy. Apan wa ko makauyon sa iyang pamaagi. Mahimo nga makigalayon ang atong nasud sa China ug Russia nga di kinahanglan awayon ang Amerika o Europa.

Di ba kanang lalake nga daghan og uyab o asawa, di man mangaway sa ilang primero o ikaduha kay mangita og ikatulo? Kabawo ta nga si Presidente Duterte makamao mo diskarte labi na sa mga chiks. Karaan bugoy gyud na siya.

Ako lang ning pangagpas. Kon pustaanay pa na sa duwa, sama sa lawn tennis, nagpasakay lang si Presidente Duterte aron padugang sa pusta. Sa lain pagkasulti, iyang gipadugo pa more ang Amerika aron modako ang ilang ayuda ug mapun-an pa ang bayloay sa katungod (reciprocal rights.)