Pelikula ni Anne Curtis yopak
MAS ganahan ko sa “Third Party” kaysa “Bakit Lahat ng Gwapo May Boyfriend.” Una, mas nindot ang direksyon ug screenplay sa Third Party kumparar sa pelikula ni Anne Curtis nga maorag gauga lang.
Ikaduha, ang mga joke ug comedy scene sa Bakit Lahat dili man siya alegre, tingali tungod kay lousy ang dagan sa estorya.
Wa koy problema sa mga artista labi na ni Paolo Ballesteros nga nindot ang rehistro sa screen ug si Anne Curtis nga nibirit pa sa kanta ni Hajji Alejandro nga May Minamahal.
Mas nilutaw pa unta ang talento nilang Dennis Trillo, Paolo ug Anne kon nindot lang ang materyal ug giplano pag-ayo kon unsaon pag-atake ang estorya. Ang resulta? Wa nako motiwas kay yopak.
JACK REACHER
Ang sequel nga “Jack Reacher: Never Go Back” ni Tom Cruise gisaway sa mga movie critic sa Hollywood. Apan pagtan-aw nako, uy nindot man. Wa ko magmahay sa non-stop action packed, thriller ug binaliay gyud sa bukog.
Gisaway ni sa Hollywood kay recycle kuno sa Jack Reacher niadtong 2012 ug dili katuohan ang plot. Kay ang nindot ra gyud alang nila ang “Mission Impossible” series.
Nakalimot sila nga sa mga ingon aning matang sa pelikula nisikat ang mga iconic movie nilang Charles Bronson (Death Wish), Sylvester Stallone (Rambo), Roger Moore (James Bond) ug bisan si Fernando Poe, Jr. Mao man nay gusto sa masa. Bisan pag recycle, ang importante makalingaw ug dali ra sabton.
ALYAS ROBIN HOOD
Niadtong Dominggo, akong nakauban ang bida sa top-rating show Alyas Robin Hood nga si Dingdong Dantes kauban ang iyang super seksing leading lady nga si Andrea Torres pila ka oras sa wala pa ang ilang Kapuso Mall Show.
Ang ilang pagbisita isip pasalamat sa mga Cebuano sa taas nilang TV rating. Kay di malalis kuha man kaayo sa Alyas Robin Hood ang kiliti sa masa: aksyon, sexy, comedy ug haum sad ang estorya sa panahon karon.
Si Andrea Torres maoy gipistahan sa mga maniniyot kay kon wa ko masayup first time to niya nga niatubang og presscon sa Sugbo. Dili siya gwapa kaayo pero ang iyang sex appeal makalumos. Ako siyang gipangutana unsay iyang beauty secret? Wala ra siyay control sa kaon pero magw eights kuno siya halos kadaadlaw.
MARLO MORTEL
Karong Oktubre 31, Lunes, atol sa Halloween party ug anniversary sale sa Gaisano Country Mall, naa ang Kapamilya star Marlo Mortel.
Ang pasundayag magsugod alas 7:30 sa gabie. Si Mortel usab ang mobukas sa "A Million Thanks" raffle promo alang sa minilyong mga pa-premyo, sama sa tulo ka brand new nga Mazda2 Skyactiv nga awto ug home appliances.
Naa say "Trick or Treat" ug libreng snacks alang sa kabataan ug uban pa nga ipanghatag sa Gaisano Main ug Country Mall atol sa mga games nga ipahigayon. Nanawat usab sila karon og contestants alang sa ilang "The Sound of Christmas" Caroling Contest, diin kapin sa P100,000 ang premyong ipanghatag. Pasko na gyud!