Tallo magpa-draft sa D-League
HINGPIT na ang desisyon ni Southwestern University (SWU) Cobras star Mark Jayven “MacMac” Tallo nga ipanimpalad na niya ang iyang talento sa mas halapad nga entablabo – Manila.
Nagkanayon ang 6’0” pointguard nga aduna pa siya’y nahabiling usa ka playing year sa Cebu Schools Athletic Foundation Inc. (CESAFI) apan dili na niya kini gamiton aron sugdan ang iyang pagpanimpalad sa Philippine Basketball Association (PBA) D-League.
“Naa pa man unta’y usa ka playing year sa Cesafi pero decided nako nga mosuway sa D-League,” matod sa two-time Cesafi MVP.
Nagkanayon ang 22 anyos nga basketbolista nga molarga siya paingon sa Manila sa sunod buwan aron ikasabot ang iyang manager nga si Edgar Mangahas kabahin sa dalan nga iyang pagatahon sa ugma damlag.
“Mag- meet mi sa akong manager para karong Novermber para magpirmahay og contract. Wala pa ko kahibalo kon asa ko nga team makaduwa kay moapil pa man ko og rookie draft sa D-League karong December 17,” matod ni Tallo.
Gipasabot ni Tallo nga bisan naa na unya siya sa Manila magduwa, iyang paningkamutan nga mahuman ang iyang pagtungha sa kolehiyo sa SWU.
Nagkanayon si Tallo nga sayod siyang lisod kini alang kaniya apan iyang paningkamutan nga ma- adjust ra ang iyang eskedyul sa basketball ug sa iyang pagtungha.
Mograduwar si Tallo sa kursong financial management karong Oktubre sa sunod tuig.
“Anugon man gud kaayo kay gamay na lang nga units ang nahabilin nako. Gawas pa, mao sab gyud ni ang usa sa akong dream nga makahuman ko og eskuwela,” matod ni Tallo.
“Bahala’g maglisod ko pero ako gyud paningkamutan nga mahuman nako ang akong eskuwela.”
Hinuon gitataw ni Tallo nga kon dili gyud madala, iya unang i-prayoridad ang oportunidad sa basketball ug hinayhinayan lang niya paghuman ang iyang pagtungha.
Gipasabot niya nga kaniadto dihang nagtungha pa lang siya sa high school ubos sa kampo sa Cebu Institute of Technology University (CITU) Wildkittens, wala niya dawata ang oportunidad nga makaduwa sa RP Youth gumikan kay prayoridad niya ang iyang pagtungha.
“Pero karon, kon dili gyud nako makaya nga dunganon ang duha, i- priority lang nako ang basketball kay sayang ang opportunity. Ako lang hinayhinayan paghuman ang akong eskuwela kay gamay na man lang sab units ang nahabilin nako,” pasabot ni Tallo.
Gibutyag ni Tallo nga nasayod na ang SWU management kabahin sa iyang plano, hinuon wala pa siya opisyal nga nakapananghid.
“Mura’g mag-meeting pa man seguro mi sa management pero aware na sila sa akong plano,” pasabot ni Tallo.