Cavaliers, Warriors pabilin nga inilog

ISAULOG ni LeBron James ug sa Cleveland Cavaliers ang labing unang mayorihiyang titulo sa paugnat sa kusog sa siyudad sulod sa 52 ka mga tuig ugma diin isaka ang ilang championship banner sa pagsugod sa 201617 season sa National Basketball Association (NBA).

Sa ilang bahin, ang Golden State Warriors mohangop sa paghiabot ni superstar Kevin Durant sa ilang balwarte ug malaumon ang ilang puwersa nga makabawi sa masakit nilang kapildihan batok sa Cavaliers sa finals series sa miaging season.

Ang duha ka mga kampo mosugod sa 2016-17 season isip labing mga paborito ug gilaumang mag-abot sila pagbalik sa finals.

Hinuon ang laing 28 ka teams maningkamot nga makapatong sa taas ug barawon ang gituohan sa kadaghanan.

Sila si Chris Paul ug Blake Griffin moagak sa Los Angeles Clippers samtang sila si LaMarcus Aldridge, Kawhi Leonard ug Tony Parker makigtambayayong sa bag-o nilang kauban nga si Pau Gasol sa pagpangulo sa San Antonio Spurs.

Ang Clippers ug Spurs duha sa pipila lang ka teams nga nalantawang adunay kapabilidad nga makaparang og insakto sa Warriors sa Western Conference.

Ang Chicago Bulls nakadugang sab og mga haligi sa paghiabot nila ni Dywane Wade ug Rajon Rondo sa ilang tugkaran. Ang duha makigtambayayong kang Jimmy Butler sa pagpangulo sa 6-time champions.

Kon buot hunahunaon, ang laing 28 ka teams nagpunterya sa Warriors ug Cavaliers nga maoy labing gusto nilang lupigon.

“Our mindset going into this year is knowing that the hunter has now become the hunted,” matod ni Cavaliers forward Kevin Love. “So we have to approach every game a lot like the last two years, knowing we’re going to get everybody’s best shot.”

Si James nag- average og 29.7 puntos, 11.3 rebounds, 8.9 assists, 2.3 blocked shots ug 2.6 steals sa miaging season, mga numero nga nag-agak sa Cavaliers sa labing una niining titulo sa NBA.

“We’re not satisfied with just winning one championship. We’re not satisfied with just being successful. We want to continue to get better,” matod ni James.

Si James nakaduwa sa finals sulod sa pito na ka mga higayon lakip na niini ang unom ka sagunson.

Una siyang nakasulod sa finals ubos sa kampo sa Cavaliers apan napakyas. Mitapon siya Miami Heat nga iyang giagak sa upat ka sunodsunod nga finals diin nakabira sila og duha ka kampiyunato.

Human niini, mibalik si James sa Cleveland ug nakasulod sa finals ang Cavaliers apan napakyas. Sa miaging season, nakabalik na sab sa finals ang Cavaliers ug ning higayuna, nakuha na nila ang korona.

“I came back to bring a championship to our city,” matod ni James. “I knew what I was capable of doing. I knew I had the right ingredients and the right blueprint to help this franchise get to a place that we’ve never been. That’s what it was all about.”

Sugdan sa Cavaliers ang ilang tahas sa 2016-17 season pinaagi sa pag- host sa New York Knicks samtang ang Warriors mo-host sa Spurs.