COJUANGCO VS. VARGAS
JOSE “Peping” Cojuangco batok Ricky Vargas.
Kini maoy umaabot nga senaryo atol unya sa pagpahigayon sa piniliay kon kinsa ang modala ug mamahimong chairman sa Philippine Olympic Committee (POC).
Hinuon ang Elections body sa POC nga gipangulohan sa chairman nga si Frank Elizalde ug naglakip nila ni Bro. Bernie Oca sa De La Salle University ug Congressman Condrado Estrella JR., chairman sa House of Representatives sa Committee on Sports, ang gikatakdang motuki ug mosusi sa application ni ABAP president Vargas kon kuwalipikado ba kini nga modagan.
Si POC vice president Joey Romasanta mibutyag nga ang tanang applications isumiter ngadto sa Comelec diin ang deadline gikatakda kagahapon.
Matod ni Romasanta nga dili pa gyud siya makakomentaryo sa eligibility ni Vargas kinsa gikuwestiyon sa mga officials nga kaalyado ni Cojuangco kinsa magpasubli sa ikaupat nga higayon.
Apan ingon niya nga dunay lagda nga kinahanglan ang kandidato nakaattend sa mga general assembly meetings aron kini eligible nga makadagan pagka POC president.
Giklaro hinuon niya nga dili kaayo siya makahatag og komento tungod kay ang Comelec lang ang adunay hurisdiksiyon niini. Apan si Vargas sa iyang habig mipadayag nga permi siyang nagpadala og representative sa tanang mga meetings.
Nagtuo si Romasanta nga kining maong panagtigi alang sa POC presidency mosampot kini ngadto sa usa ka corporate battle tungod kay pulos man adunay igong tinubdan ug pundo nga makakuha og mahalon nga mga abogado.
Ang sportsman businessman nga si Manny Pangilinan, president sa Samahang Basketball ng Pilipinas kinsa nagsuporta og walo ka mga nagkalainlaing sports atoa kini modapig ni Vargas nga maoy iyang longtime partner.