ABU SAYYAF NIA SA CEBU
Kapulisan sa rehiyon alerto, terorista gipanid-an
ALERTO karon ang Police Regional Office (PRO) 7 human masigpati sa ilang tigpaniid nga ania sa Sugbo ang upat ngadto sa unom ka sakop sa teroristang grupo nga Abu Sayyaf , usa kanila dakong opisyal sa teroristang grupo.
Tungod niini, ang mga dagkung tindahan gipahimangnoan nga hugtan ang ilang pagbantay ug monitoring.
Niadto pang Biyernes nakadawat og kasayuran ang PRO 7 sa giingong presensya ni Alhabsi Misaya nga usa sa mga sub-group commander sa Abu Sayyaf nga nagbasi sa Mindanao nga, matod pa, naa dinhi sa Sugbo.
Matod ni Supt. Julian Entoma, ang maong mga sakop sa teroristang grupo gikan sa Dapitan City ug nisakay kini og barko paingon sa dakbayan sa Dumaguete ug niadtong Sabado, nitabok paingon dinhi sa Sugbo.
Ang puwerto sa Dapitan usa sa ka nautical highway nga agianan sa mga nagdala og sakyanan nga mobiyahe padulong sa Kabisay-an ug ngadto sa Luzon.
Ang grupo ni Misaya maoy responsabli sa pagpanagit sa mga langyaw didto sa ubang mga lugar sa Mindanao nga gituohan sa kapulisan nga mao usab ang tuyo niini dinhi.
Apan ang ilang counterpart sa Mindanao nitugan bag-uhay lang nga ila na usab nakita ang presensya ni Misaya sa maong siyudad apan ang uban nga kauban niini dinhi sa Sugbo wala nila masigpati nga posibling nagpabilin pa kini sa Central Visayas.
Tungod niini ang ila karon nga gimonitor pag ayo ang posibling presensya sa kaubanan nga wala na makita didto sa Mindanao.
KIDNAPING?
“Ang among duda ani kidnapping ang ilang pinaka target posibling foreigner of prominent personalities kay mao man ni ilang koan kidnap for ransom mao nang alerto ang Negros Oriental kay daghang tourist ug diri sa Cebu,” matod ni Supt. Julian Entoma.
Ang hepe sa Cebu City Police Office (CCPO) Sr. Supt. Joel Doria nitug-an nga ila pang gipa- validate sa iyang intelligence kung unsa ka tinuod ang ilang nakuha nga impormasyon gikan sa Mindanao.
Apan bisan pa man niini gipaalerto hinuon nila ang tanang police station ug gipa- monitor ang presensya sa maong grupo dinhi sa syudad sa Sugbo nga posibling mohimo ug kasamok.
Matod ni Col. Doria nga wala pa gilibkas ang ilang alert status sukad gideklara ang state of lawlessness ni President Rodrigo Duterte ug andam sila kung duna may presensya sa Abu Sayyaf.
Ang hulagway karon ni Alhabsi Misaya ang gipang apud-apod na sa police stations ug special units lakip na ngadto sa publiko aron masayod ang katawhan sa panagway niini.
“May mga report tayo na natatanggap ngunit subject pa ito sa validation and confirmation at wala tayong dapat ipag alala, di tayo dapat maalarma nandyan naman ang ating kapulisan nakaalerto palagi,” matod ni Sr. Supt. Joel Doria.
Nakig-alayon na sila karon sa Muslim community pinaagi sa ilang Deputy City Director for Operation nga usa usab ka Islam nga si Supt. Timar Alam.
Wala man silay nakita nga hulga nga dunay himuon nga teroristang pagpangatake apan kinahanglan nga kapangandaman kini sa kapulisan.
Giawhag hinuon niya ang publiko nga kung dunay mamatikdan nga dautan ug lihok sa ilang barangay mahimong makapanawag kini sa labing duol nga police station.
Giawhag sa mga opisyal sa dakbayan sa Sugbo ang katawhan sa pagbantay ug pagreport sa kapulisan kon adunay mga tawo nga kadudahan og mga lihok.
AWHAG NI TOMAS
Si Mayor Tomas Osmeña niawhag ngadto sa mga Muslim nga nia nagbase sa dakbayan sa pagpakigtambayayong sa kapulisan bahin sa giingong presensiya sa Abu Sayyaf.
Ang mayor nagkanayon posibleng adunay mga local contact ang maong mga bandido hinungdan nga nangayo og tabang si Osmeña sa mga Muslim brother sanglit sila maoy nakaila sa mga muslim nga nia sa Sugbo.
Si Konsehal Dave Tumulak, chairman sa public order and safety, niawhag sa katawhan sa pagbantay sa tanang panahon.
Giawhag usab niya ang mga tag-iya og pension house, hotel, restaurant sa pagdoble sa ilang siguridad lakip na ang mga bus terminal, airport, pantalan ug simbahan.
TERORISTA
Ang Abu Sayyaf (ASG) usa ka Jihadist terror group nga nagbase sa Jolo ug Basilan islands sa kasadpan sa Pilipinas.
Ang ASG giila nga labong bayolente nga grupo sa nasod nga naghimo sa teroristang pagpangataki sama sa pagbomba sa Superferry 14 niadtong 2004, diin 116 ka tawo ang namatay.
Ang ilang nglan gikan sa Arabic abu ("father of") ug sayyaf ("swordsmith").
Sumala sa Wikipedia, niadtong 2012, ang grupo gibanabana nga dunay 200 ug 400 ka mga miyembro gikan sa 1,250 sa 2000.
Sukad niadtong 1991, ang ASG naghimo og pagpamomba, kidnappings, assassinations, ug extortion labi na sa Mindanao.
Lakip sa ilang kriminalidad mao ang rape, child sexual assault, forced marriage ug uban pa.
Ang nihulagway sa ilang kaugalingon nga nakigbisiog alang sa independente nga Islamic province sa Pilipinas.
(Dugang ni PAC)