Nasunogan makabalik: Osmeña

DI angay mabalaka ang gatusan ka mga pamilyang nasunogan sa Brgy. Duljo Fatima,dakbayan sa Sugbo kay makabalik ra sila sa ilang gipuy-an.

Mao kini ang pasalig ni Mayor Tomas Osmeña kay ang lugar nga nasunogan iya sa kagamhanan.

Gawas niini, nipahibawo usab ang mayor nga iyang doblehon ang naandang financial assistance, gikan sa P10,000 ngadto na sa P20,000 nga madawat sa matag pamilya nga nasunogan.

Wa pay labot ang housing materials.

Ang ubang nasunogan partikular sa barangay Suba ug ubang barangay ilawom sa administrasyon ni Osmeña makadawat og samang ayuda.

Matod pa ni Osmeña nga di angay nga himuong sukaranan ang sunog sa pagpapahawa sa mga pamilya nga nagpuyo sa yuta nga di ilaha ang titulo.

Siya niingon nga sa Duljo, di maglisod ang mga tawo sanglit gipanag-iya kini sa gobiyerno ubos sa Slump Improvement Resettlement (SIR).

Si Osmeña nagkanayon nga di pa siya makahukom sa pagpaubos sa re-blocking sa lugar hangtod di pa niya masusi ang dapit.

Apan iyang gipaniguro nga buhaton sa dakbayan sa Sugbo ang mga paagi aron di na masubli ang maong matang sa katalagman diin naglisod ang mga bombero sa pagpawong sa kayo tungod sa kahagip-ot sa agianan.