Lopez miawhag kang Utlang nga mag-sorry

GUMIKAN sa diwa sa Pasko, di mosang-at og kaso si Busay Barangay Kapitan Amilo Lopez batok ni Dr. Alice Utlang, executive director sa City Office for Substance Abuse Prevention (Cosap), gumikan sa pre-mature nga pag-anunsyo sa pagpositibo sa iyang urine sample sa gidiling drugas.

Ang Cosap nilusad og surprise drug test sa mga barangay kapitan niadtong Oktubre didto sa White Gold House atol sa ilang quarterly meeting ug sa dul-an 60 ka mga kapitan kang Lopez maoy nigawas nga positibo.

Ilang gipasanginlan si Utlang nga maoy nipagawas sa resulta sanglit way laing nasayod sa screening ug matod pa ni Lopez nga hangtod di ma- confirm magpabilin kining confidential subay sa balaod.

Iyang gibutyag nga nanawag kaniya ang usa ka reporter (di sa Superbalita Cebu) ug niingon nga si Lopez ang nag- positive sa drug test subay sa pamahayag sa hepe sa Cosap.

Apan iyang gihulagway nga lahi ang nahitabo sanglit ginganlan siya ni Utlang sa mga interview sa tigbalita bisan kon wa pay confirmatory test didto sa Manila.

Si Lopez nag-negatibo atol sa confirmatory test ug matod pa niya nga bisan pa og nagnegatibo na siya, naguba na ang iyang pangalan, nauwawan ang iyang pamilya ug ang barangay nga iyang gialagaran.

“Ako diskumpyado ko ngano ilang gipagawas nga wala pa may confirmatory. Mao moingon ko ni doktora kay Christmas man ron gusto ko mangayo ko ni Utlang og public apology nga siya mismo mangayo og sorry nako, way problema tawo raman ta. Kon di siya mangayo og sorry nako mapugos ko pag- file og kaso pag- revoke sa iyang lisensiya isip usa ka doktora,” matod ni Lopez.

Gihatagan nila ang kampo ni Ultang hangtod karong Lunes sa pag-isyu og apology sa di pa sila mosang-at og reklamo.

Si Utlang sa iyang bahin nagkanayon nga di siya mangayo og pasaylo kang Lopez sanglit iyang gipahimug-atan nga wa siya nagbutyag sa pangalan sa kapitan.

Matod sa pangulo sa Cosap nga katungod usab ni Lopez ang pagpasaka og sumbong diin iyang gihulagway nga si Lopez ang angay basulon sanglit siya ang nagpatawag og presscon.

“Siya may gapahibalo sa pagpapresscon. In fact, ako pa siya giingnan nga di pasultihon sa iyang mga kauban kay gayawyaw naman siya but nagpa- prsesscon man hinoon siya,” padayag ni Utlang.