Kapitan Cabanes di protektor sa drugas: Dante

GIKLARO ni P/Supt. Emerson Dante, hepe sa Talisay Police Station, nga di si Kapitan Perla Cabanes ang iyang gipasabot nga protector sa ilegal nga drugas sa Barangay Tangke.

Una niini nahimong kontrobersiyal ang pamahayag sa hepe sa Talisay human kini miingon nga di masumpo ang ilegal nga drugas sa Tangke tungod sa mga opisyal sa barangay nga naglingkod tungod kay adunay protector.

Si Cabanes mihagit ni Dante nga panganlan ang opisyal nga protektor.

Kini tungod kay nauwaw na siya ug iyang pamilya tungod sa pamahayag sa hepe.

Matod ni Cabanes nga nauwaw na siya lakip na ang iyang pamilya sa dihang nigawas sa mga balita nga adunay opisyal sa ilang barangay nga nisuway sa paghangyo sa kapulisan nga buhian ang dinakpan.

Iyang gihagit si Dante nga panganlan ang opisyal aron sa makausa maklaro kon si kinsa kini og malimpyohan usab ang pangan sa mga opisyal nga nagtinarong sa ilang trabaho.

Apan si Dante miingon nga way angay nga kabalakan si Cabanes tungod kay di man siya ang gipasabot.

Matod niya ang niduol kaniya aron sa paghangyu nga buhian ang tawo nga ilang nasikop kinsa nalambigit sa gidiling drugas ug miingon nga iya kining gitambagan ug gihatagan og higayon nga magbag-o ug di na mousab.

Si Dante nitataw nga gi- monitor na kini niyang mga konsehal kun unsa ang ilang partisipasyon sa ilegal nga kalihukan apan kon klaro nga nalambigit kini ila kining ikonsiderar nga high value target sanglit opisyal man sila sa gobyerno.