Sakop sa Cebeco 1 way siga ugma

SUD sa 10 ka oras maapektahan ang linya sa kuryente sa 10 ka mga lungsod ug siyudad sa habagatang Sugbo nga ubos sa Cebu Electric Cooperative (Cebeco) I ugma gumikan sa himuon nga maintenance.

Si Betty Martinez, corporate communications officer sa National Grid Power Corp., nipahibawo nga tungod kini sa pag-ilis ug pagtaod sa ekipo sa Cebeco I ug Cebeco II sama sa instrument transformer ug metrohan.

Matod niya apil sa maapektahan nga linya ang siyudad sa Carcar ug mga lungsod sa Sibonga, Argao, Dalaguete, Alcoy, Boljoon, Barili, Ronda, Alcantara ug kabahin sa Moalboal.

Magsugod ang pagtrabaho alas 7:00 sa buntag hangtod sa alas 5 sa hapon, adlawng Dominggo.

Si Martinez nidugang nga kon mahuman og sayo ang pagtrabaho, ibalik usab dayon ang koneksyon sa kuryente sa gitakda nga oras.