Barko nga nasangad midaot sa sanctuary
NAKAHIMO na og assessment ang Bureau of Fisheries and Aquatic Resources (BFAR) 7 sa kadaot nga naangkon sa marine sanctuary nga nasangaran sa m/v Super Shuttle Ferry 3 atol sa pagkusokuso sa bagyong Marce sa miaging semana.
Kini, samtang si Baltazar Tribunalo, officer-incharge sa Provincial Environment and Natural Resources, nisuwat ni Paul Rodriguez, presidente ug chief executive officer sa Asian Marine Transport Corp, ang tag-iya sa nasangad nga barko.
Sa suwat nga pinetsahan og Nobiyembre 25, 2016, si Tribunalo niawhag ni Rodriguez nga moisyu og letter of undertaking nga ginotaryo nga maghatag og garantiya nga ang kompaniya andam mobayad sa iyang obligasyon sa namugna nga kadaot sa barko human masangad sa marine sanctuary.
Ang sangtuwaryo, nahimutang duol sa Hilantagaan Island, nga sakop sa lungsod sa Sta. Fe, isla sa Camotes.
Si Romel Kirit, senior environmental management specialist sa Penro, nibutyag nga duna nay assessment ang BFAR 7 sa danyos nga nahimo sa pasaheroan nga barko.
Apan itandi una kini sa miaging data sa marine sanctuary sa wa pay mahitabo ang pagkasangad sa m/v Super Shuttle Ferry 3 nga gidumala ni Nick Aromin, ug ang resulta mao ang danyos.
“I-convert nato na to monetary value, ang resulta maoy bayaran sa shipping company,” matod ni Kirit.
Base sa asoy sa mga sakop sa peoples’ organization nga nagbantay sa sangtuwaryo, dako ang kadaot tungod kay mga coral ang naigo sa barko.
Si Kirit nidugang obligasyon sa tag-iya sa barko ang pagbayad sa kadaot.
“Sila may naka- cause og damage. There was really negligence sa ilang part, the fact nga naanod na diha, that means to say wa nila maayo og anchor,” dugang niini.
Sa report ni Lea Escarlan, municipal disaster risk reduction and management officer sa Sta. Fe, siya nagpahibawo nga ang m/v Super Shuttle Ferry 3 nasangad sa marine sanctuary atol sa bagyong Marce.
Sa pakisusi sa Cebu Coast Guard Station, ang barko giangkorahe sa pantalan sa lungsod gumikan sa dautan nga panahon.
Apan tungod sa kakusog sa hangin ug bawod, napadpad ug naanod kini sa Hilantagaan Island duol sa sangtuwaryo kun gibanabanang dos kilometros ang gilay-on gikan sa pantalan.
Ang barko nakuha na gikan sa sangtuwaryo ug gidala sa lungsod sa Liloan aron susihon kon duna bay buslot ilawom niini human masangad.
Ang Kapitolyo mohimo og restoration ug rehabilitation nga mga plano aron pagpahiuli sa naapektahan nga mga coral sa sangtuwaryo.
Karong sunod semana mag-abot ang mga opisyal sa Penro, BFAR, PO ug kompaniya sa barko alang sa assessment sa kadaot.