2 lalake nagpahungaw sa kasuko, nagtinigbasay
BATUAN, Bohol - Susamang nakigbugno sa ilang tagsa-tagsang kinabuhi ang duha ka mag-uuma human kini nagtinigbasay gamit ang hinagiban nga mahait dihang nagkabingkil ang duha didto sa Purok 5, Barangay Janlud, lungsod sa Batuan niadtong milabayng adlaw.
Giila ang biktima nga si Fortunato Buaya, 64, minyo samtang ang gitudlong suspek mao si Alexander Linogao, 52, minyo ug susamang residente sa nahisgutang lugar.
Sa pasiunang pakisusi sa kapulisan, nasayran nga ang suspek giingong misulong ngadto sa pinuy-anan sa biktima diin gatakin kini sa mahait nga sundang sa may hawak niini.
Giingon usab nga ang suspek ubos sa impluwensiya sa ilimnong makahubog.
Sa pag-abot sa suspek sa panimalay sa biktima, giingong grabe kaayong kasuko ang makita sa nawong niini ug gisampit ang biktima aron sa paggawas sa panimalay ug didto nagkalalis ang duha ka mag-uuma nga giingon nga samang lango sa ilimnong makahubog.
Mainitong komprontasyon ang nahitabo sa duha nga miresulta sa panagtigbasay gamit ang tagsa-tagsang mahait nga sundang.
Samang nakaangkon og mga samad tinigbasan ang duha ka maguuma ug parehong gidala sa tambalanan ug anaa sa tandugonon nga kahimtang. Gihuwat sa kapulisan nga mamaayo ang kahimtang sa duha aron makuhaan kini sa ilang tagsa-tagsa ka bahin mahitungod sa insidente.