4K gikinahanglan nga dakpon sa kapulisan

TAGBILARAN CITY, Bohol — Gipasalig sa hepe sa kapulisan sa tibuok Bohol nga di sila magpasagad og panakop sa mga gidudahang nalambigit sa ilegal nga drugas.

Kini bisan pa nga ang pagbukas sa Operation Double Barrel Alpha sugod sa Oktubre 27, magpahimutang sa usa ka quota alang sa kapulisan sa tibuok Bohol.

Segun sa taho, kinahanglang makadakop ang kapulisan sa 4,606 ka mga suspek nga nahilambigit sa bisan unsang paagi sa ilegal nga drugas hangtud sa Disyembre 31.

Kini usab mipaturok sa kahingawa sa mga sakop sa Provincial Peace and Order Council (PPOC) nga mahimong tungod sa kadaghan sa kinahanglang ma- accomplish, basin may pagpasagad nalang nga mahitabo.

Gibungat sa sakop sa PPOC nga si Romeo Teruel nga unta ang kampanya batok sa drugas, di ilhon sa kadaghan sa tawo nga madakpan.

Apan, gipasalig ni P/SSupt Felipe Natividad sa Kampo Dagohoy nga di sila desperado nga mao na kanay buhaton.

Gidason usab sa Kampo Dagohoy nga ang kampanya batok sa drugas nia na sa ang-ang sa paglimpyo, kanus-a, halos wa nay mga lumilihok sa ilegal nga drugas nga nagsige pa sa ilang buhat.

Kini usab bisan pa nga ang kapulisan, maningkamot gihapon nga igkita kadtong mga personalidad nga nangkagiw na human masayud nga lakip sila sa lista sa mga naduhig sa ilegal nga drugas.

Didto sa PPOC, gipadayag ni Natividad nga segun sa ilang datus, gikan sa Oktubre 28, mas daghan ang ilang na- account nga mi- surrender ug masikop kay sa ilang gihimo-an og tinuyo nga operasyon.

Dungan usab niini, gibutyag sa kapulisan nga dungan sa pagsugod sa Double Barrel Alpha, mas panegurohon sa kapulisan ang paglimpyo aron ikadeklarar na ang kalungsuran nga luwas na sa hulga sa drugas.