Terror alert level 3
HUMAN sa travel advisory para sa habagatang Sugbo nga giluwatan sa US Embassy karong bag-o, dia na sa’y laing pasidaan. Si Chief PNP Ronald dela Rosa sa niaging Huwebes nipahibalo nga ang tibuok nasod gipaubos sa Terror alert level 3. Kining pahibalo ni dela Rosa una nakong nasayran sa ABS CBN News Channel ug gisundan sa text message sa Police Regional Office - 7 pinaagi sa ilang Public Information Officer nga si Police Chief Inspector Dexter Calacar. Sa text message sa PRO-7 ilang giawhag ang publiko nga magpabiling kalmado ug kanunayng mabinantayon. Ilang gipasabot nga ubos sa Terror alert level 3 ang pagpangataki sa mga terorista dakong posibli. Tungod sa maong pasidaan ang kapulisan gipaabot nga modoble sa ilang paningkamot paglusad og subsub nga checkpoint, pagsiksik sa mga motorista, pagrunda sa mga dapit nga posibling gilubluban sa mga terorista dinhi sa Central Visayas. Puno sa text message ni Calacar, ang PRO-7 modugang sa iyang puwersa diha sa mga pantalan, airport
ug bus terminal. Hinuon ilang gipasalig nga ang Central Visayas nagpabiling malinawon ug luwas batok sa bisan unsang hulga. Way angay nga ika alarma samtang ang PNP ug militar padayon nga nagtinabangay pagsiguro nga magpabiling hapsay ang tibuok nasod. Apan ang National Security Adviser nga si Hermogenes Esperon Jr. niluwat og sukwahi nga pamahayag. Matod niya di tinuod ang giluwatang pasidaan ni Chief PNP dela Rosa. Matod niya sa Cotabato, Davao ug Zamboanga ra ang gihulga og way labot ang ubang dapit sa nasod. Mao na ni ron. Kinsa may atong tuhoan, si dela Rosa o si Esperon?
MABINANTAYON
Pero para nako may terror alert level man o wala nga luwatan di gihapon angay nga mokompiyansa. Sama sa boksing bisan kapila na matumba ang boksidor samtang makabarug pa ug wa pa undanga sa referee ang away dako pa gihapon ang kahigayonan nga ang nakapabor nga boksidor mapatumba sa iyang kuntra. Ang importante nga ang pagka mabinantayon sa kanunay mopatigbabaw kay kining mga terorista way kalainan sa linog mokalit lang og pakurog sa atong kaunoran nga di lang gyud damhon.
RUFINO
Daghan ang nangumusta ni Rufino Tapdasan kadtong 8 anyos nga manaygunay nga taga Barangay Cantao-an sakop sa siyudad sa Naga. Katapusan mi nga nagkita niadtong Sabado atol sa Grand Halad sa Kapamilya sa ABS CBN didto sa CTU. Way duda daghan ang nakadayeg sa kanindot niya mokanta ug mokutingkuting sa yukelele human siya nihalad og pipila ka awit didto. Ang iyang abilidad sagad nga masaksihan sa Baywalk sa maong ciudad. Karon di na siya igkita didto human gibadlong sa Social Welfare office. Matod ni Kapitan Apolonia Natad, si Mayor Christine Vanessa Chiong nitunol og ginagmay nga pohunan para sa iyang Lola Eluminada para makapangumpra og utanon ug prutas nga ilang ikasuroy. Motutuk nalang si Rufino sa iyang pag-eskwela og pag praktis og mga bag-ong kanta pinaagi ni Jasmin ang anak ni Kapitan Apolonia.