Imbestigasyon batok ni Davide?
DILI makalihay si Gov. Junjun Davide sa sitwasyon sa Cebu Provincial Detention and Rehabilitation Center (CPDRC) nga nasudlan og ilegal nga drugas. Command responsibility niya ang dili maayong performance sa iyang gitudlo nga namahawa na sa pwesto nga sila si jail consultant Marco Toral ug jail warden Romeo Manansala. Kadtong hiniusang ronda sa PDEA, PNP ug BJMP nakasakmit og bulto sa shabu. Naboking human gipasiatab nga drug free ang CPDRC. Hinungdan nga miluwat ug gihulipan sila si Toral ug Manansala. Giingong tinubdan sa shabu ang maong bilanggoan nga anha kuhaon ni Arman Tipon-tipon nga usa ka piniriso. Giyagyag ni Manansala ang ilegal nga binuhatan ni Toral sama sa pagpaabang og kwarto nga P30 matag oras, special treatment sa pipila ka mga binilanggo, namaligya og gadgets ug gitugotan ang mga bisita nga makaistar og lima ka adlaw sulod sa CPDRC. Dihay nasakpang nagsuyop og shabu si Maximo Cedeno duha ka adlaw human ipahigayon ang Oplan Tukhang. Tulo ka K-9 dogs ang gipabantay kay naa gihapoy palusot sa drugas. Bag-o pa lang clerk sa maong prisohan nga si Glenndon Dabuco nasikop kay drug pusher. Sumala pa sa Cebu Provincial Police Office nga misaka og 94 porsento sa mga barangay sa lalawigan ang apektado sa drugas. Laing kontrobersiya maong dunay pipila ka mga empliyado nga nagdawat og duha ka sweldohan usa niini konsehal sa barangay sa samang higayon kawani sa kapitolyo nga nadestino sa CPDRC. Angayng mabasol ang gobernador nga gitudlong consultant si Toral nga usa ka ex-convict. Wala usab panumbalinga ni Davide ang mga suwat nga gipadangat nga nagsaysay sa kahiwian ug ilegal nga binuhatan sa iyang mga sinaligan nga nakamansa sa iyang kabuotan ug kaligdong. Hayan magsagubang si Davide og imbestigasyon sa kongreso human mabalaka si Deputy Speaker Gwen Garcia sa kahimtang sa CPDRC nga iyang gihapsay sa siya pay gobernador. Istriktong gipatuman ang no smoking, no special favor, pagsakmit sa mga kontrabando, ban sa sugal ug kwarta, gisulbad ang kahuot ug pagpadali sa natanggong nga mga kaso. Gihatagan og livelihood ug gitudloag sayaw silbing rehabilitasyon diin maoy produkto ang viral video sa Cebu’s Dancing Inmates. Nunot niini si Garcia misang-at og resolusyon nga nag-awhag sa ubos balay-balaoranan sa pag-inbestigar sa dili maayong pagdumala sa administrasyon ni Davide. Nagkwestyon usab nganong nalakip sa DILG nga Honor List of Governors sa maayong programa batok drugas nga dili haom kay dunay ilegal nga nagnegosyo sulod sa CPDRC. Atong paaboton kanusa mohalang ang congressional investigation.
Kahinomdoman sa gobernador pa si Garcia mideklarar og gubat batok sa drugas, rebelde, ilegal nga sugal, ilegal nga negosyo ug panagat bahalag kinsay maligsan ug kalyo nga matumban. Walay kulba nga pagpaguba sa illegal structures sa Kawasan Falls sa utlanan sa Sulsugan, Balhaan ug Matutinaw sa Badian aron himoong municipal park ug protected area. Gipabungkag ang ilegal nga negosyo sa Malapascua Island sa Daanbantayan. Gitukod ang Anti-Illegal Fishing Task Force. Giumol ang Team Eskina diin Team A manakop sa pinabuthang isda, Team B sa illegal quary operation ug Team C manakop sa overloading.