Di diay puro kadaut ang dala sa tambok
DAGHAN ang mga estoryang di tinuod kabahin sa saturated fats. Daghang mga tawo ang nagtuo nga ang saturated fats bati sa imong panglawas—hinungdan sa sakit sa kasingkasing, mopataas sa cholesterol ug mobabag sa imong kaugatan.
Ang tambok nga karne, mantika sa lubi, butter ug cream mao ang pipila sa mga tinubdan sa saturated fat. Apan ang sagol sa saturated fat duna usab diay kaayuhang dala, sama sa pagsuporta sa imong utok, panit, immune system, kasingkasing ug thyroid.
Mopalig-on sa kabukogan
Samtang kita magkatiguwang, manghumok ang atong kabukogan mao nga dali ra kitang mapiang o mabalian. Matod ni Michelle Roots, resident fitness expert sa Trainezer, aron motuhop ang calcium sa atong kabukogan, gikinahanglan nato ang tambok.
Mopahimsog sa utok
Ang neurons sa imong utok nagkinahanglan og nutrina nga mao ang tambok, aron maayo ang function niini. Matod ni Roots nga ang labing dakong bahin sa utok mao ang tambok ug cholesterol. Siya nipasabot nga gikinahanglan ang tambok aron molambo pa ang pagtrabaho niini.
Mopalig-on sa immune system
Ang atong white blood cells maoy moila ug moatake sa mga kagaw nga mosulod sa atong lawas. Apan gikinahanglan niini ang igo nga gidaghanon sa saturated fats aron motrabahog maayo, dugang ni Roots. Pipila sa mga pagkaon nga mopalig-on sa imong immune system mao ang coconut oil, citrus fruits, turmeric ug green tea.
Maayo sa kasingkasing
Aron maayo ang blood pressure, gikinahanglang matug og sayo ug minusan ang stress. Mapugngan ang sakit sa kasingkasing niini. Apan aron usab maayo ang kasingkasing, gikinahanglan ang saturated fats.
Maayo sa atay
Ang research nagpakita nga ang saturated fats makatabang sa maayong pagtrabaho sa atay. Matod ni Roots nga ang saturated fat motabang sa pagpanalipod sa atay gikan sa alcohol ug mga tambal.