OH, PASKO!
Nanuktok ka sa pultahan Sa akong kahilom Ug ang kakamig nga imong Gipadaitol sa akong kasingkasing Nahimong biawan sa pangandoy Sa akong tingusbawan. Wala na akoy pagsalig Sa imong mga hata ug gaugao Nga mabuhi pa ang mga damgo Nga gisagpo sa mga pag-antos Ug pakigbisog ning akong Pagpaningkamot. Wala pa akoy talad nga napuno Sa lamiang mga pagkaon, Wala pa akoy kurtina nga gidayan Sa bentana sa gusbat kong pinuy-anan. Ug wala pa akoy pinaskuhan Nga gidunol sa kubalon kong palad. Ang tanan igo na lang sa matahom Nga pangindahay. Oh, Pasko, himamaton ko ikaw Bisan sa napukan kong paglaom!