Magminyo na

Dear Noy Kulas,

Tawga lang ko og Isyot, 38 anyos, kanhi drug user pero nagbait na sukad sa miaging tuig. Clean living na ko ron kay nakaamgo ko nga way padulngan ang akong kinabuhi kon magsige ra ko og gamit og illegal drugs. Nagtarong na ko sa akong trabaho kay nindot na akong feeling sa kinabuhi.

Sa among magsuon, ako na lang ang single ug nagpuyo uban sa among mga ginikanan. Tanan nakong mga igsuon nangaminyo na ug ang uban toa sa gawas. Naa koy uyab nga toa sa abroad nagtrabaho. Gusto siya nga moapas ko kay naa na siyay condo unit ug siya rang usa ang nagpuyo.

Sa akong edad karon, gusto na kong mo settle down apan ang problema nako, Noy, way mahabilin sa among parents nga mga tiguwang na. Karon ako ang gaatiman ani nila. Mao nakaundang gani ko sa akong pagka drug user kay si Mama mao ang nagmaymay nako. Ang akong uyab langas na kaayo kay gusto niyang moapas na ko niya ug adto mi magminyo. Unsa ang akong buhaton? Anugo na ang opportunity nga sa akong edad, naa pay gustong makigminyo.

ISYOT

Syot,

Pag-estorya mong magsuon parte nianang pagatiman sa inyong mga ginikanan. Di maayo nga ikaw na lang usab tanan tungod kay kitang tanan dunay katungod nga malipay. Kon magminyo ka, kinahanglan nga di sila mobabag kay basic right lagi na nimo nga mopili unsay imong buhaton.

Naa kay mga igsuon nga toa sa abroad, mahimo nga mag-amutay mo og helper o caregiver nga makabantay kanila. Wa pa man kahay naglisod ana nila sa paglihok? Kon wa pa, di lisod ang pagpangita og kasaligang tawo nga motan-aw ana nila. Sultihi ang imong uyab kabahin nianang problema aron makatimbang usab siya sa imong biyaan nga responsibilidad. Segurado ko, magkasinabot ra mong tanan kon way sibag og utok sa inyong pamilya. Pagtakda og time sa imong paglarga aron sila ma- pressure usab sa pagpangita og paagi nga makapuli sa pagtan-aw sa inyong parents.

NOY KULAS