Gobernador, pulis miawhag sa publiko nga di mahadlok

DILI angay ikaalarma ang pagpaubos sa Philippine National Police sa tibuok nasod sa Terror Alert Level 3, matod ni Gobernador Hilario Davide III.

Mao usab kini ang pamahayag sa Police Regional Office (PRO) 7.

Inay mahadlok, ang gobernador nihangyo sa mga Sugboanon nga magpabilin nga kalma ug magbinantayon sa matag adlaw nga gimbuhaton.

Siya nipasabot nga kabahin sa standard operating procedure sa PNP ang pagalerto sa tibuok puwersa niini human sa suway nga pagpamomba duol sa U.S. Embassy didto sa kaulohan sa miaging mga adlaw.

Si Davide niklaro nga ang gibuhat sa kapulisan sama sa pagpahigayon og checkpoint ug pagdestino og mga pulis sa mga publikong dapit, alang sa kaluwasan ug seguridad sa publiko labi pa sa hulga sa mga terorista nga gusto motisok og kagubot.

Matod sa gobernador nga base sa pagtataw ni National Security Adviser Hermogenes Esperon Jr. ang terror alert giisyu ni PNP chief Ronald “Bato” De La Rosa alang lang sa Davao, Cotabato ug Zamboanga.

Siya nidugang ang pag-isa sa full alert status sa kapulisan gipahaom sa nagsingabot nga Pasko ug ang deklarasyon alang sa proteksyon sa mga tawo.

“In the Province of Cebu, rest assured that there is no cause for alarm,” gipaneguro ni Davide sa opisyal nga pamahayag niini nga gipadala sa Provincial Information Office ngadto sa media.

Siya nidugang nga 24 oras nga nakaalerto ang tanang puwersa sa kapulisan ug militar sa lalawigan aron maseguro nga masumpo ang dautang plano sa mga terorista.

“Again, resume your daily activities, enjoy the Christmas season. Don’t be alarmed but always be alert,” dugang ni Davide.

WA GIISA

Bisan si PRO 7 Director Noli Taliño niingon nga di angay iisa ang alert level sa Sugbo kay wa silay nadawat nga impormasyon nga dunay mga terorista sa Sugbo.

Wa pa madawat ni Taliño ang memorandum gikan kang PNP Chief Ronald Dela Rosa apan tungod sa iyang pamahayag sa media, andam silang mopatuman sa ilang alert level.

Awhag niya sa publiko nga di angay nga mabalaka ug mag panic nunot sa mga nahitabo sa kaulohan ug Mindanao apan iyang pahimangno nga magmabinantayon sa palibot ug ipahibawo kon dunay mamatikdan nga kadudahan sama sa mga butang sa usa ka lugar nga gituohan nga delikado ang sulod.

“Nothing to worry. Hindi dapat mag panic basta ang importante dyan maging vigilant lang tayo, alert. I-report lang natin sa police yung mga suspicious activities, suspicious looking persons even unattended baggage ireport lang sa pinaka malapit na police station,” matod ni Taliño.

Mahimong sub-sub ang ilang operation batok sa gidudahang mga terorista ug ilusad usab nila ang lapad nga mga checkpoint, depende sa sitwasyon.

Sa mosunod nga mga adlaw, ang mga pulis sa nagkadaiyang police station molusad usab og oplan bakal sita sa mga dapit nga dunay mga tawo nga magtapok panahon sa kagabhion.

Usa sa katuyoan niini aron mapugngan ang krimen sa usa ka lugar ug di lang ang terorista ang ilang mapakgang.