Sugbo nanghakot og mga award sa natad sa turismo

NANGHAKOT ang Sugbo sa labing una nga Choose Philippines Awards sa ABS-CBN nga gipahigayon sa Dolphy Theater niadtong Huwebes sa gabii.

Ang Sugbo nakadawat sa Best Accommodation for Solo Travelers alang sa Plantation Bay Resort and Spa; Best Water Form usab ang Kawasan Falls; ug Best Festival ang Sinulog.

Ang executive director sa Sinulog Foundation Inc., Ricky Ballesteros mao ang nidawat sa maong pasidungog.

Gipildi sa Sinulog Festival ang mga nominado alang sa Best Festival in the Philippines Category lakip ang Kadayawan Festival sa Davao, Panagbenga Festival sa Baguio, Pahiyas Festival sa Quezon Province ug ang Masskara Festival sa Bacolod City.

Gikan sa Agusto hangtod sa Septiyembre karong tuiga, nisumiter ang netizens lukop nasod sa mga nominasyon niini sa mga nagkadaiyang kategoriya ug gikan didto gipagawas ang shortlist ug gipilian sa eskperto sa industriya ug sa travel bloggers.

Lakip sa gipasidunggan ubos sa Best Accommodation ang Villa Escudero sa Quezon alang sa pamilya, Stilts Calatagan Resort sa Batangas alang sa magtiayon ug Balesin Island alang sa Barkada.

Alang sa Best Destinations, gipasidunggan ang The Ruins sa Negros Occidental alang sa Heritage Sites; El Nido Resorts sa Palawas alang sa Islands and Beaches; Mayon Volcano sa Albay alang sa Mountains and Volcanoes; ug Picnic Grove sa Tagaytay alang sa Recreational Sports.

Best Pinoy Advocate usab si Zosima Acuram, kinsa usa ka magtutudlo sa Banduria sa Bohol.

Best Pinoy At Heart usab si Kyle “Kulas” Jennerman gikan sa nasod sa Canada.

Samtang Best Dish ang Max’s fried chicken alang sa Poultry Dish; Rodick’s beef tapa sa Beef Dish; Buffalo Bros baby back ribs sa Pork Dish; Kuya J’s Restaurant’s lumpia presko sa Vegetable Dish; Shrimp Bucket’s salty eggsperience sa Seafood Dish; First Colonial’s Grill sili ice cream isip Panghimagas o dessert; Lars buko batchoy sa Fusion; ug Barrio Fiesta’s karekare sa Native Delicacy.

Ang Choose Philippines, usa kini ka website diin naghatag kini og impormasyon sa mga lugar diin nindot adtoan, kanan ug bisitahon sa nasod sa Pilipinas.

DAGHAN PAG KUWANG

Gihangop sa Provincial Tourism Office ang mga award apan giangkon niini nga daghan pa ang kinahanglang palambuon aron mamintinar o di ba kaha malabwan pa ang maong mag pasidungog.

Kini sama sa mga imprastraktura, paghatag og mas dekalidad nga serbisyo ug pagpaabot sa benepisyo sa turismo ngadto sa lokal nga komunidad.