Cuba pinakaungo sa chess

ANG nasud sa Cuba bag-o lang namatyan sa ilang usa ka pinakakontrobersial nga lider sa kalibutan nga si Fidel Castro.

Dili na lang ko mosuwat bahin niya kay hapit tanan tawo nakahibawo na sa iyang kaagi. Adto lang ta sa chess portion.

Ang Cuba maoy pinakaungo sa chess. Lupig ang Russia, China, Amerika, Germany, Britain ug India.

Mas daghan sila nga grandmasters kay sa Cuba pero mas dako kaayo ang ila populasyon.

Ang Cuba nga may 11 milyones ra ka mga tawo, adunay 43 ka mga grandmasters apil ang siyam ka babaye .

Ang usa sa pinakasikat nga player mao si Jose Raoul Capablanca, world champion sa una ug para sa mga experts maoy pinakamaayo sa tanan.

Ang Cuba gi-embargo sa Amerika ug dili makaadto ang mga Amerikano didto. Naay exception kon moduwa og chess sa sikat nga Capablanca Memorial.

Gasugod ni ang memorial sa 1962 ug maoy pinakadagko og premyo sa una. Ang nagtukod ani si Ernesto “Che” Guevara nga partner ni Castro sa ilang rebellion.

Ang chess compulsory sa tanan eskwelahan ug ang Cuba ra ang ako nahibawan nga naay mga maestro ug maestra nga gitawag og “chess professors.”

Sobra ni sila sa usa ka libo. Naa sila Latin American Institute of Chess (Isla) nga motudlo sa mga promising players ug mga chess professors.

Ang world record nga participants sa usa ka tournament sa usa ka adlaw niabot og sobra 13,000 sa 2004 sa Havana. Ang ikaduha sa Cuba gihapon sa 2002 nga sobra sa 11,000. Niapil niini si Fidel Castro.

Sa 1966 nagduwa sila ni Bobby Fischer nga nidaug kuno si Castro pero legend ra ni ug dili gyud tinuod. Pero daghan ang miingon nga Master ang iyang kalibre kay bawot sila ni Che Guevara nga gikonsider nga international master. Chess ang hilig ni Castro ug Guevara maong nagkakuyog sila sa rebellion. Sige sila magduwa sa bukid.

Daghan mga bata nga kahibawo nga moduwa og chess pero dili pa kamao mobasa. Daghan kaayong chess clubs nga puno na ug adto na moduwa ang uban daplin sa dalan.

Naay mga pamphlets nga gibaligya og menos usa ka sentimo para sa mga seryuso moduwa. Gisuwat ang mga saktong tactics sa duwa apil og balita sa chess sa kalibutan.

Ang pinakamaayo moduwa karon si Leinier Dominguez 2752 nga no.17 sa kalibutan. Siya ra ang latin American nga naa sa top 100.

Giembitar sa among club Cepca ang usa ka Cuban nga magsimul sa CebuWalter Arencibia nga world junior champion sa 1990. Nakugang ang mga customs ug DFA kay diplomatic iya passport! Timailhan ni nga VIP sa ilang nasud.