NASANTA
GSW pilde sa Rockets sa 2 ka OT
NAGKINAHANGLAN ang Houston Rockets og laing triple-double ni James Harden ug season-best ni Ryan Anderson aron pakgangon ang sunodsunod nga himaya sa host Golden State Warriors pinaagi double-overtime nga kadaugan, 132-127, kagahapon sa National Basketball Association (NBA). Si Harden nagpakatap og 29 puntos, 15 rebounds ug 12 assists aron iposte ang ika-43 nga triple-double sa iyang career. Niposte sab og 29 puntos si Anderson nga maoy labing dako niyang nahimo sukad masukad. Sa pagpangulo nila ni Harden ug Anderson, naputol sa Rockets ang 12 ka sunodsunod nga kadaugan sa Warriors. Hinuon nagpatong gihapon ang Warriors sa overall leadership dala ang 16-3 nga rekord samtang ang Rockets ningsulbong sa 12-7 nga baraha. Si Harden nakapabuto og threepoint bomb unya naka- assist kang Eric Gordon aron hatagan ang Rockets og 130-124 nga labaw sa hinapos nga bahin sa ikaduhang overtime. Gitubag kini ni Warriors forward Draymond Green og kompletong three-point play aron pahakan ang labaw sa Rockets, 127-130, sa himatyong segundos. Sa nahabiling 08.4 segundos, mi- graduate si Green human niya na- foul si Trever Ariza. Kalmadong gipasulod ni Ariza ang iyang duha ka freethrows aron iseguro ang kadaugan sa Rockets. Si Gordon maayo sab nga nakaduwa alang sa Rockets ug nitampo kini’g 23 puntos alang sa kadaugan. Ang Rockets aduna pa’y dugang tulo ka mga magduduwa nga nakahimo og double-digit nga puntos. Ang Warriors gipangulohan ni Kevin Durant pinaagi sa iyang 39 puntos, nihatag og 28 puntos si Stephen Curry, nitampo og 20 puntos si Green samtang nitunol og 15 puntos si Klay Thompson.