Donaire dili una hatagan og rematch

WBO champ Magdaleno dili pa interesadong makig-rematch

GIKLARO sa bag-ong World Boxing Organization (WBO) super bantamweight champion Jessie Magdaleno nga dili niya ihatag kang Nonito “Filipino Flash” Donaire ang gipangayo niining dinalian nga rematch.

Si Magdaleno, kinsa adunay 24-0, 17KOs nga rekord, miilog sa WBO title gikan kang Donaire pinaagi sa unanimous decision nga kadaugan niadtong Nobiyembre 5 sa undercard sa Manny PacquiaoJessie Vargas bout.

Si Donaire, kinsa adunay 37-4, 24KOs nga baraha, mikuwestiyon sa desisyon sa mga judge ug alang kaniya, angayan lang siyang mahatagan og dinaliang rematch. Gawas pa sab, batbat ni Donaire

nga gihatagan niya og dakong oportunidad si Magdaleno ug ning higayuna, angayan lang nga suklian siya sa Amerikanong boksidor pinaagi sa dinaliang rematch. Apan gipasabot ni Magdaleno nga dili si Donaire maoy naghatag kaniya og dakong oportunidad kon dili ang iyang tumang paningkamot aron maangkon ang iyang gipangandoy nga world title.

“I would like Donaire to get some more fights in and make his way back up. He’s been all over Twitter and Instagram saying he gave me an opportunity but he didn’t give me no opportunity,” matod ni Magdaleno sa interbyu sa www.boxingscene.com.

“I worked hard for it. I was the mandatory fighter for that belt since the beginning of the year and he didn’t want to give me the fight. He actually ducked me twice.” Hinuon giklaro ni Magdaleno nga wala niya hingit isirado ang pultahan alang sa posible nilang panag-away og balik ni Donaire.

Gipasabot niya nga ning puntoha, mangita pa siya og laing mga oportunidad nga naghuwat sa iyang agianan.

“Maybe later on down the road that fight can happen but for now I want to see what else is out there for me. I want to see whatever other big names at 122 are there for me,” dugang ni Magdaleno.