ANAK SAKSI PAGPATAY

13 anyos nga dalagita gatan-aw sa killer sa papa

TRESE anyos nga dalagita gihakop sa tumang kakuyaw human patya sa iyang atubangan ang iyang amahan sa nag-inusarang killer.

Kuyog sa dalagita ang iyang amahan samtang sila nagsakay sa motorsiklo pasado alas 6 sa milabayng gabii sa sityo Kaparang, Barangay Kalunasan, dakbayan sa Sugbo.

Ang gipatay giilang mao si Rodrigo Daclan, 56, electrician sa Cebu City Hall ug naa sa Department of Public Services (DPS) na-assign.

Sa pasiuna nga imbestigasyon ni PO2 Alberto Diamante ug mga kauban sa Homicide Section nagbutyag nga nagmaniho og motorsiklo si Daclan.

Iyang angkas ang iyang anak nga babaye gikan sa tunghaan niini.

Usa ka wa hiilhing tawo nga nag jacket og itom ug nagsul-ob og bonnet ang kalit nga nibabag sa ilang dalan.

Si Daclan nga nakabantay daling mihunong ug nikanaog aron unta komprontasehon ang maong tawo.

Apan wa siya makabantay nga kini armado, giunhan siya sa pagpusil makadaghan nga higayon.

Nisibat ang gunman nga yano ra nga naglakaw samtang ang anak nga babaye ni Daclan nga nagsudong sa hitabo, nalisang ug wa na katingog.

Sa dihang wa na makita niya ang killer, ang dalagita daling nakapauli sa ilang balay ug nangayo og tabang. Ila dayong natawagan ang kapulisan. Pito ka mga kabhang sa bala gikan sa armas nga 9mm ang napalgan sa kapulisan sa dapit nga nahitaboan.

Dugang nasayran sa mga pulis nga bag-o pa nanimuyo sa dapit si Daclan human mobalhin gikan sa dan A. Lopez, Brgy. Labangon.

Di pa makatino ang kapolisan sa motibo.

WA NA MAKASIBAT

Suspetsadong durugista nga kanunay mosibat kon i-tokhang gipatay sulod sa ilang balay sa Rainbow Village, Barangay Kinasang-an, pasado alas 5 kagahapon sa kadlawn.

Ang biktima giilang mao si Fritz Michael Tiu, 35 kinsa gibuwagan sa asawa, estambay ug nagpuyo sa lugar.

Sa inbestigasyon nagbutyag nga migawas sa iyang gipuy-an si Tiu ug nipaingon sa pansayan sa dihang gipusil makaduha ka mga higayon.