Talisay mo-regulate sa pabuto

PAGPAMALIGYA og mga pabuto sa dakbayan sa Talisay gustong ipa-regulate sa konseho karon nga nagkaduol na ang Pasko.

Si Konsehal Soc Fernandez mipalabang og usa ka resulosyon nga naghangyo sa hepe sa Talisay Police Station nga i- regulate ang pagpabaligya og mga pabuto sa ilang siyudad.

Ang resulosyon ni Fernandez naghangyo sa ilang hepe nga si Supt. Emerson Dante nga iparegulate ang pagmaligyag mga pabuto aron malikayan ang mga disgrasya o sunog nga mahitabo.

Matod ni Fernandez nga karon nga nagkaduol na ang Pasko, daghang mga pabuto ang ibaligya bisan sa dagkong mga tindahan.

Apan kinahanglan nga ilhon sa kapulisan ang mga lugar nga adto sila mamaligya sa pabuto ilabi na ang pag- testing.

Iyang giawhag ang mga opisyal sa barangay nga moabag usab sa kapulisan pagbantay niadtong mga mamagligya nga di designated area.

Si Konsehal Raul Cabanero, presidente sa Associaton of Barangay Council, niingon nga silang mga opisyal nipaluyo sa maong plano.

Kon siya lang ang pabut-on, gusto niya nga wagtangon ang pagpamaligya og pabuto aron way kuyaw sa aksedenti ug sunog.

Apan tungod kay negosyo kini ug wa usay balaod nga nagdili na sa pagpabaligyag pabuto, ang ilang gihimo sa konseho mao ang pag- regulate.

Matod ni Cabañero nga mas maayong adto ang pagbaligya sa South Road Properties ug dili sa bisan asang lugar sama diha sa merkado sa Tabunok.

Hinuon sa pagkakaron adunay gipagawas nga kamandoan ang Department of Labor and Employment nga ihunong una ang paghimog ug pagbaligyag mga pabuto human sa sunog sa Bulacan mugna sa pabuto nga mikalas og kinabuhi.