Pakuhaon og permit ang utility companies
TINGUHA ni Konsehal Malcolm Sanchez sa dakbayan sa Mandaue nga obligahon ang mga pribado ug panggobyerno nga utility companies sa pagkuha una og street ug sidewalk work permit kon mohimo og bisan unsang proyekto o kon adunay tukuron sa mga sidewalk ug kadalanan sa dakbayan.
Sa iyang explanatory ordinance, naobserbahan ni Sanchez nga sagad sa mga proyekto nga gihimo sa utility companies way pagpahibalo o notisiya sa kagamahan sa dakbayan.
Dugang ni Sanchez nga ang bisan unsang klase sa proyekto o construction sa sidewalk ug kadalanan makaapekto sa trapiko nga makaingon sa pagkahasol di lang sa mga motorista apan ilabi na sa publiko nga moagi sa usa ka lugar.
“There exists a pressing need for the City of Mandaye to take control and account ofall projects and constructions on and along the sidewalks, roads and streets so as it can properly manage the negative effects to the public that arise from these projects and construction,” sumala pa ni Sanchez.
Ubos sa ordinansahon, ang mga government-controlled ug pribadong gipanagiya nga utility company kinahanglang mokuha una og street ug sidewalk permit gikan sa City Engineer’s Office
Kini kuhaon sa minimum nga 30 ka adlaw sa di pa sugdan ug mahuman ang proyekto o konstruksyon. Kinahanglang ilakip sa permit ang expiry date, pasabot nga ang pagbuhat sa proyekto o konstruksyon kinahanglang mahuman sa di pa ang adlaw o sa adlaw sa expiration date sa permiso.
Kon pakyas ang rehistrante sa pagkompleto sa proyekto, kini mobayad og P200 alang sa unang extension fee.
Sa Section 5 sa ordinansahon, responsable usab sa usa ka aplikante nga ibalik ang naguba niini nga sidewalk or karsada nga apektado sa pagbuhat sa proyekto
Gikinahanglan nga makompleto pagtrabaho ug magamit na ang dan sud sa 15 ka adlaw.
Apan bisan pa man nga way labot ang Department of Public Works and Highways ug ubang ahensya sa gobyerno kalabot sa mga bayrunon, apan gikinahanglan gihapon silang mokuha og street ug sidewalk permit.
Ang di motuman sa ordinansahon makamulta og P10,000 sa unang kalapasan; P15,000 sa ikaduha ug P20,000 sa ikatulong kalapasan.
Kon ang rehistrante pakyas sa pagkuha og street ug sidewalk permit sa ikaupat nga higayon, i- blacklist kini sa dakbayan sud sa usa ka tuig ug ang pangan sa kompaniya ilakip sa listahan sa negative contractor list.
Kon aprobahan ang ordinansahon, ang initial nga P100,000 nga pundo ang ihatag sa general operating funds.