Espinosa ilubong karon sa Albuera, di sa Ormoc
NAKUGANG ang pamilya Espinosa sa pagbalik ni Philippine National Police Chief Ronald Dela Rosa sa puwesto ni Supt. Marvin Marcos sa Criminal Investigation and Detection Group 8 pipila ka adlaw sa wala pa mapatay si Mayor Rolando Espinosa Sr.
Si Marcos girelibohan sa puwesto human mapatay sa operasyon sa CIDG 8 ang mayor sud sa selda niini sa Baybay sub-provincial jail niadtong Nobiyembre 5 dihang isilbi ang duha ka search warrants batok niya ug sa laing piniriso nga si Raul Yap.
Si Rolando, ilubong karong hapon sa sam-ang sa Albuera, Leyte diin kini nangalagad nga mayor sa wala pa mapatay.
Nausab ang plano sa pamilya sa paglubong sa mayor nga unang naplanohan sa dakbayan sa Ormoc.
Si Ramon Espinosa, maguwang sa mayor, unang nisulti nga hayan dili makahatod sa lubong sa iyang amahan si Kerwin Espinosa.
Mismo ang mga abogado ni Kerwin nga dili na mohatod sa lubong alang sa iyang seguridad.
Si Presidente Rodrigo Duterte niangkon nga siya ang nagsugo ni Dela Rosa nga ibalik sa puwesto si Marcos.
Ang presidente nitug-an nga siya ang nagmando ni Special Presidential Assistant Bong Go nga tawgan si Dela Rosa ug ibalik sa puwesto si Marcos sa CIDG 8.
“Natapos na yun, si Dolina was cleared. Marcos, positive. Kasi I was keeping track of his movements. Alisin mo ako doon, mawala bigla ang… Mawala lahat. Hindi ko masundan,” pamulong ni Duterte sa interview sa CNN Philippines niadtong Biyernes sa gabii.
Si Emma Espinosa, asawa ni Ramon, sa interview sa Sun.Star Cebu nikwestyon sa motibo sa presidente.
“Why man? Why man nga gi-reinstate siya nga the fact nga nitubag man gud sila sa senate nga sila man gud ana di ba?” pangutana ni Emma.
Ugma, mag-atubangay si Kerwin ug Ronnie Dayan sa pagpadayon sa Senado sa imbestigasyon sa pagkamatay sa mayor bahin sa ginadili nga drugas.