Bangi sa utlanan sa San Roque, Tangke ipahilot sa konseho

PANAGBANGI sa utlanan sa Barangay San Roque ug Barangay Tangke gustong sulbaron sa konseho sa dakbayan sa Talisay.

Dugay na kaayo ang maong suliran apan wa pa masulbad ang panagilog sa ilang tagsatagsa ka utlanan.

Kini gikinahanglan karon kay nahuman na ang South Road Properties (SRP) ug aduna nay Talisay Fish Port sa lugar.

Atol sa session sa konseho, si Bise Mayor Alan Bucao nimando kang Konsehal Gail Restauro, chairman sa committee on laws ug ni Association of Barangay Council (ABC) president Konsehal Raul Cabañero nga maoy mohusay ilabi na sa duha ka mga sitio nga gikalibogan kon asa nasakop.

Si Kapitan Perla Cabanes sa Tangke niingon nga ang mga residente sa mga sitio San Rafael ug Kalinao diha sa ilang barangay narehistro.

Gawas pa niana, sila sab ang mohusay sa mga residente sa lugar kon adunay katuyoan sa ilang barangay.

Si Cabanes nipakita sa mapa gikan sa Siyudad nga aduna’y 197 ektarya ang San Roque samtang 43 ektarya ang sa Tanke.

Base sa maong mapa, hayan di na makonsiderar nga coastal barangay ang San Roque tungod kay iya naman sa Tangke ang lugar sa baybayon.

Sa iyang bahin, si Kapitan Elzevier Abraham sa San Roque nagkatawa sa dihang niingon si Cabanes nga di na apil sa coastal barangay ang San Roque.

Siya nagkanayon nga 232 ektarya ang ilang luna ug lakip sila sa coastal barangay sa Talisay.

Giangkon usab ni Abrahan nga ila ang duha ka mga sitio base sa pagapply sa tax declaration alang sa real property sa 30 ka aplikante.

Gipaabot lang una sa konseho ang report sa duha ka mga konsehal nga mituon, apan kon way kasulbaran, hayan ang tibuok konseho ang motuon niini.