Mga wheelchair, sungkod gihatag sa seniors
MOABOT og 100 ka mga sungkod ug 10 ka mga wheelchair ang gihatag sa buhatan ni Konsehal Jerry Guardo ngadto sa mga senior citizen, mga lolo ug lola nga dili na makatarong og lakaw.
Si Guardo kinsa nakigtambayayong sa Mizuki Enterprizes nga gipanag-iya ni Haruo Iwanaga, usa ka Japanese national apan dinhi na nagbase sa dakbayan sa Sugbo, maoy personal nga nihatag sa mga benepisyaryo.
Si Onie Abellana, taga Barangay Basak San Nicolas, way kabutangan sa iyang kalipay sanglit nakadawat siya og wheelchair ug makaadto na siya sa iyang adtuan kay di siya makalakaw og tarong.
Si Eddie Jumao-as wa makapugong sa iyang gibati ug nakahilak human iyang gidawat ang wheelchair sa miaging adlaw sa lobby sa legislative building sa Cebu City Hall nga gitambungan usab ni Bise Mayor Edgardo Labella.
Si Iwanaga nagkanayon nga sukad pa kaniadto, kanunay na siya nga mopahigayon og outreach program alang sa mga bata ug mga batan-on hinungdan nga nasulod usab sa iyang hunahuna ang pagtunol og ayuda sa mga senior citizen.
“It’s a blessing for these people. Dugaydugay nako diri sa Cebu and I always think what I can help to the people like senior citizens and I will continue until mahurot ang senior citizens sa paghatag og sungkod,” padayag ni Iwanaga.
Ang Cebu City adunay labing daghan 100,000 ka mga lolo ug lola apan di tanan kanila nagkinahanglan og sungkod ug wheelchair.
Apan iyang gipadayag nga matag buwan mohatag siya uban sa buhatan ni Guardo og tag 100 ka sungkod nga ginama gikan sa Japan.
Gawas sa Cebu City, si Iwanaga mohatag usab og 100 ka sungkod sa lungsod sa San Fernando pinaagi kang Mayor Lakambini Reluya ug laing 100 ka sungkod sa lungsod sa Ronda ni Mayor Mariano Blanco III alang sa sunod semana.
Sa kinatibuk-an, moabot na og 350 ka mga sungkod ang ilang nahatag sa mga senior citizen ug 50 ka mga wheelchair.