Mandaue nagplanong mopalit og luna; P18 M gikinahanglan

BUOT sa konseho sa dakbayan sa Mandaue nga tun-an ang tanyag kon mahimong paliton sa kagamhanan sa dakbayan ang 3,500 square meters nga luna nga gipuy-an sa usa ka homeowners association sa Brgy. Tipolo.

Matod ni Bise Mayor Carlo Fortuna nga iyang itugyan ang tahas ngadto sa Committee on Laws & Ordinances, Committee on Assets, ug Committee on Socialized Housing kon way legal nga babag ang plano pagpalit sa luna sa San Vicente Ferrer Lower Tipolo Homeowners Association Incorporated (SVFLHAI) sa Tipolo nga planong tukoran og baratong pambalay.

Atol sa regular nga sesyon sa konseho, si Fortuna niingon nga natahas sa City Appraisal Committee ang 9,501 square meters sa dapit diin ang 3,500 square meters niini gamiton alang sa planong low- cost housing sa homeowners association.

Ang luna pribadong gipanag-iya nila ni Rene Espina ug Rufinita Remollo.

Matod ni City Assessor Richard Flores nga ang appraisal value sa propiyedad anaa sa P5,190 matag square meter.

Dugang ni Flores nga kini nagpasabot nga kon paliton sa Dakbayan ang luna, kini nagkinahanglan og P18.165 milyones.

Padayag niya nga giduso na mismo sa City Legal Office ngadto sa Community Affairs of the Housing Unit and Development Office kon mosugot kini o babagan ang pagpalit sa luna sanglit naglisod ang Dakbayan sa pagpangita og luna alang sa informal settlers.

Adunay duha ka mga relocation site ang Dakbayan sa Mandaue- ang 6.5 ektaryang luna sa Brgy. Paknaan ug 9.2 ektarya sa Guizo ug Mantuyong.

Di mominos sa 1,200 ka mga pamilya na ang kasamtangang nanimuyo sa 6.5 ektarya nga relocation site sa Paknaan diin ang mga pamilya atua nagpuyo sa danger zones niadto.

Samtang padayon usab ang site development sa nasunugan nga relocation site sa Guizo ug Mantuyog, ang maong dapit nasunog niadtong Marso nga nakaapekto sa di mominos 2000 ka pamilya.

Plano ni Mayor Luigi Quisumbing nga mopalit og luna sa silingang dakbayan sa Lapu-Lapu o lungsod sa Consolacion ug Liloan tungod kay wa nay bakanteng luna pa ang Mandaue alang sa mga informal settler.