Manok tayhupan aron momahal
NIKATAP ang usa ka video nga nagpakita sa mga manindahay og manok nga nipaburot sa lawas sa manok gamit ang ilang baba aron halinon sa mga konsumedor.
Daghan ang wa makauyon ug giluod sa makita sa video nga nikatap sa social media nga nagpakita sa gibuhat sa pipila ka mga tindera og manok.
Ang footage gikataho nga nakuha sa La Victoria, Venezuela.
Sa footage, makita nga gipaburot ang lawas sa manok sa mga tindera pinaagi sa pagtayhop gamit ang ilang baba, aron mobugat ang timbang sa manok ug momahal ang presyo.
Ang buhaton sa manindahay, gunitan ang liog sa manok ug tayhupan gamit ang baba sud sa pipila ka segundos.
Ang nakakita sa video nabalaka nga ang gibuhat sa mga manindahay posible mopakatap og mga sakit.
Matod sa La Republica, usa ka Italian nga mantalaan, nga ang manok nga motimbang og 2 kilos mokuyos ngadto sa 1.5 kilograms.
Kini ang gidudahan nga hinungdan kon nganong gibuhat sa mga manindahay ang maong paagi.
Ang mao nga mantalaan niingon, matod sa Mirror News, nga susama nga hitabo ang nakaplagan duha ka tuig na ang nakalabay ug gisumbong ngadto sa kapulisan.
Ang mga manindahay nga nasakpan nagbuhat niini, gipangtakupan ang mga tindahan.
Apan sa makita sa video, kini nagsugyot nga nabalik na usab ang maong binoang sa merkado.