Donasyon alang sa simbahan
TABLA, Sudlon 1--Nasumok ako ning maong lugar kagahapong adlawa gumikan kay mikuyog ko sa grupo nila ni Barili Councilor ug bus operator Julie Flores nga nag-donate og tiles alang sa comfort room (CR) project ni Fr. Bernard Oyao nga mao ang kura paruko sa St. John de Baptist parish diri sa Tabla. Kaniadto, kining maong simbahan usa ka quasi-parish kay ubos man kini sa Guadalupe Parish. Gumikan kay wala pa man madonate ang luna nga gitukuran sa simbahan ngadto sa Cebu Archdiocese. Apan karong bag-o nahimo na kining full-pledged parish ug si Fr. Oyao mao ang unang kura paruko. Wala intawoy mangamot nga mga parokyano maoy hinungdan nga limitado ang budget ni Fr. Oyao. Nahibawo naman ta nga lisud kaayo ang panginabuhi sa atong kaigsuonan sa bukid. Di puwede nga ang mga saging, lagutmon ug mga manok nga donasyon sa mga parokyano maoy ipalit og tiles ni Fr. Oyao. Si Fr. Oyao nangayo nato og tabang sa iyang proyekto nga comfort room gumikan kay limitado ang budget.
Nakadungog si Konsihal Flores sa panawagan ni Fr. Oyao mao nga misanong kini. Dugay na usab silang managka-ila si Konsihal Flores ug Fr. Oyao kay na-assign man ang pari sa Carcar City kaniadto. Playmate sila sa tennis. Gikontak ni Konsihal Flores, ang iyang mga kauban sa grupo sa ‘Truck of Cebu’ og nagtampu-tampu aron i- donate sa pari nga ipalit og mga tiles. Miabot ug P26,000 ang ilang na- donate.
Ang ‘Truck of Cebu’ grupo sa mga prominenteng mga tawo, mga negosyante sa Carcar ug Sibonga nga nanag-iya og mga hi-end pick up vehicles. Gawas nga magsuroy-suroy sila sa tibuok lalawigan sa Sugbo sa ilang free time uban sa ilang pamilya matag weekend, aduna usab silay community projects nga makatabang sa katawhan. Daghan na og natabangan ang grupo. Aktibo usab sila sa paugnat sa kusog sama sa tennis ug basketball, biking, labi pa kay si Flores usa sa mg sports commissioners sa Carcar city government.
Kuyog ug naglangkob sa maong gropo mao sila si Joseph Kong, usa ka mini-bus operator, Nestor del Rosario, Paul Langbid, Show Bacon, Danny Baynosa, Ramises Lapis, Mark Labajo ug si Britt, ang ulitawong anak ni Konsiha Flores. Mikuyog usab ang ilang pamilya. Ang maong gropo usab ang mi-donate sa dakong imahin ni Mama Mary sa simbahan gihapon ni Fr. Oyao. Mikuyog usab namo si Fr. Mark Barneso, ang kura sa St. John Mary Vianney sa Maomawan, Babag, sinlingang barangay sa Sudlon.
Nalipay si Fr. Oyao sa donasyon sa Truck of Cebu gumikan kay makompleto ang iyang proyekto. Akong na-obserbahan nga gikinahanglan tuod ang desenteng pansayan sa ning maong parokya. Morag mahuman ang CR simbahan matayming inig sugod na unya sa Simbang Gabii sa sunod semana. Aw, kay bukid lagi, ang mga tiles nila Konsihal Flores gisuklian og lamian nga pagkaon sa pari. Alegre ang gropo.