Gulpi di Gulat
Binasi sa Isa 11:1-10; Salmo 721-2.7-8.12-13.17; Roma 15:4-9 ug Matteo 3:1-12
NAKASUWAY naba kamo nga aduna’y gipangamdaman nga bisita, selebrasyon o usa ka kalihokan? Unsa man ang inyong gibati sa dihang nangamdam pa kamo? Siguro adunay mobati og kakulba, kalipay, ug ang paghinamhinam sa pagabot niini. Samot na gani siguro kon wala nato mapangandami ni no? Makugang siguro kita.
Kami sa akong grupo sa Dilaab nanagsagol ang gibati kay karong umaabot na 06 Disyembre 2016 moabot na ang among gipaabot nga inagurasyon sa among bagong opisina nga nahimutang sa IEC Pavilion. Kulba kay daghan pa ang mga angay andamonon unya limitado ang panahon. Aduna pud kalipay sa grasya nga nadawat ug sa mga tawo nga mitabang aron mapanindot kini. Paghinamhinam sa umaabot nga serbisyo nga among ikadalit sa mga tawo.
Ingon ani sad ba kaha ang gibati ni Juan nga Magbubunyag sa iyang tahas sa pagpangandam sa dalan ni Jesus? Ug unsa sad kaha ang atong gibati sa iyang tawag sa pagpangandam? Gani kon may tawo nga manaygon sa atong tugkaran nga taas kaayo og buhok, siga ang mata, bungoton, ug nagsanina og lukay sa lubi puwerteng kuruga tingali nato no?
Makapakugang usab si Juan nga Magbubunyag. Buhok sa kamelyo ang iyang bisti nga kibaksan og bakus nga panit. Dulon ug dugos ang iyang kalanon. Iyang tingog milanog sa mga pulong: “Paghinulsol kamo kay duol na ang Gingharian sa Kalangitan.”
Gulpi di gulat kaayo kini og dating si Juan. Nganong gilakip man kini siya sa mga balasahon sa Adbyento? Morag nasaag man kini siya. Imbis nga makadani siya ngadto sa malinawong pasungan sa adlaw sa Pasko, mora man hinuon nga lain ang atong mahunahunaan.
Unsa may kalambigitan ni Juan sa umaabot nga Pasko? Unsa may kalambigitan niya kang Jesus?
Managagaw si Juan ug si Jesus. Tataw kini sa ebanghelyo ni Lukas. Tataw usab nga gitandi kini silang duha. Ang ginikanan ni Juan taga Jerusalem, usa ka dakbayan, samtang si Maria ug Jose taga Nazaret, usa ka gamay nga baryo sa bukidnong lugar sa Galilea. Promdi diay sila.
Lahi ang pagkamabdos ni Maria. Walay labot ang tawo. Tali lamang kang Maria ug Ginoo. Bisag sa sabakan pa lamang, dayag na ang pagkalahi ni Jesus. Dili siya usa ka ordinaryong bata.
Balikan nato si Juan. Sa dihang miduaw si Maria kang Isabel, nga unom na ka buwan nga nagsabak kang Juan, miulpot ang bata sa tiyan ni Isabel. Miila na kini sa pagkahalangdon ni Jesus. Misimba ang bata nga gisabak.
Maaninaw na nato dinhi ang tahas ni Juan. Ang kaigmat niining tawhana wala magagikan sa iyang kasuod kang Jesus isip igagaw. Propeta kini siya ug hait ang pananaw sa mata sa iyang kalag. Tungod niini naguna siya kang Jesus aron pangandaman ang dalan. Giisip nga si Juan maoy gihisgotan ni propeta Isaias: “Ang tingog nga nagsinggit didto sa kamingawan: ‘Andama ninyo ang dalan sa Ginoo. Himoa ninyo og tulid ang iyang mga agianan.’” Tigandam diay siya sa pagabot ni Jesus.
Makatulo moabot si Jesus. Ang Pasko nagbaliklantaw sa iyang unang paganhi, isip bata. Sa katapusan sa panahon, mobalik si Jesus aron paghukom sa mga buhi ug mga minatay. Kabus siya sa unang pagabot; mahimayaon sa sunod.
May ikatulo: ang pangadlawadlaw nga pagabot ni Kristo sa atong tagsatagsa nga kasingkasing ug sa atong tawhanong kasaysayan. Kanunayng nagtuktok si Jesus. Gipasulod ba nato siya? Naminaw ba kita sa mga bagong Juan nga Magbubunyag nga maoy “naguna” sa mga pangadlawadlawng duaw ni Jesus?
Kinsa man kini sila? Dili ikalalis nga ang tahas ni Juan mahitungod sa pagpahigmata sa katawhan sa ilang mga kakulangan. “Paghinulsol kamo,” matud niya. Apan ang kapasayloan sa sala wala magagikan kang Juan. Kang Jesus kini, sa iyang pagpakamatay sa krus (Mt 1:21 ug 26:28).