`Triplets’ nga Mani, Tina ug Sheryl nabuhi
SA mga maka-80’s siguro wala gyuy wala makasinati sa kasikatan sa “Triplets” nga silang Manilyn Reynes, Tina Paner ug Sheryl Cruz.
Naa silay tagsa-tagsa ka mga panatikong nagsunod sa matag usa kanila, gani bisan pa man ug managhigala ang tulo may mga away sa isig ka fans nga nahitabo.
Patalbogay gyud ang tulo sa ilang career mapa-akting o kantahan, may mga pelikula silang nabuhat nga kauban silang tulo apan may tagsa-tagsa usab silang pelikula nga gihimo.
Kauban nila ang ilang mga kalabtim nga sila Janno Gibbs, Cris Villanueva ug Ramon Christopher mao nga misamot ang ilang kasikat. Kinsa may makalimot sa mga kantang “Unang halik” ni Tina Paner, “Sabi ko na nga ba” ni Sheryl Cruz ug “Sayang na sayang” ni Manilyn Reynes.
Sa tulo nga pareho nakong nakauban kaniadto sa kaulohan, mas na- close ko sa atong paisanang si Manilyn Reynes. Sa mga wala nakahibalo gawas kang Janice de Belen, si Manilyn ang nag- introduced nako sa hapit tanang artista sa showbiz labi na sa mga taga “Thats Entertainment” mao nga mapasalamaton usab ko kaniya.
Nahimo siyang tipik sa akong career sa matag interbyu nako sa mga celebrities. Si Mani ang usa sa nagpadasig nako sa akong mga panayam kanila.
Dugay na kini nga panahon ug karon sama siguro nako naghinam-hinam usab nga makita sila og balik sa usa ka teleserye sa Kapuso network.
Tinuod kini mga fans ang “Triplets” makita sa bag-ong serye sa GMA 7 nga “Meant to Be” nga silang Manilyn Reynes, Sheryl Cruz ug Kristina Paner.
Ang “Meant to Be” pagabidahan sa GMA’s best actress ug drama sweetheart nga si Barbie Forteza uban nilang Jak Roberto, Addy Raj ug Ivan Dorschner nga misuroy dinhi sa Sugbu aron sa pag-imbitar kanato sa ilang teleserye.
Sa akong nahibaw-an ngadto nganhi ra si Manilyn kay anaa man dinhi ang iyang ginikanan ug may mga gi-atiman usab ang guapa dinhi. Ayg saba.
Kongrats ug best wishes ni Ruby ug Angelo nga bag-ohay lang gikasal sa Remedios Parish Church ug ako maoy nahimong emcee sa ilang reception, salamat usab Jeanette.... ay’g saba!