Mga sugilanon ni Alex
“UNSA may sekreto nimo, Tiyo Alex, nga hapit kada adlaw mogawas man imong sugilanon sa SUPERBALITA?” matod ni Jomar nga nagbitbit og kopya sa SUPERBALITA diin napatik ang sugilanon sa iyang uyoan. Misaka siya sa pantawan sa balay sa iyang uyoan nga nagdukdok karong sayong buntag og laing sugilanon sa iyang ‘portable typewriter’ diha ibabaw sa lamesita.
Nagbarog sa tiilan sa bungtod sa baryo Hagipo ang balay ni Alex, ibabaw og diyutay sa balay sa ginikanan ni Jomar. Manghod si Alex sa Papa Romeo ni Jomar. Ulitawong guwang si Alex nga nalingaw lag panguma, pananggot ug panagat. Unya tungod sa kalaay ug kamingaw sa iyang kinabuhi, nakat-on og panulat.
Mipahiyom si Alex sa iyang pag-umangkon nga bayong-bayong. Sa iyang kahimtang malipay siyag dunay mobalda niya sa iyang ‘hobby.’ Ganahan siyang dunay kahinabi. Hinuon kon way makighinabi niya, ang papel maoy iyang patikan og sugilanon.
“Kon mosulti ko nimo, di na na sekreto,” ni Alex nga nagpahiyom. Gitangtang niya ang iyang antiyuhos ug gibutang ibabaw sa papel nga ‘ rough draft’ tupad sa makinilya. Unya misandig sa sandiganan sa plastik niyang lingkuranan.
“Bitaw, Tiyo. Kay inigka dako nako gusto sab kong mosulat og mga sugilanon. Nindutan sab kong moguwa akong ngalan sa tabloid,” ni Jomar nga milingkod sa lantayng kawayan.
“Mao nay pinakauna sa tanan. May gusto ka, may hilig o interes sa panulat,” ni Alex. “Unsa pa, Tiyo?” ni Jomar. “Sunod, kanang tabian ka. Ako, tabian kaayo ko kon dunay ka-estorya. Kon wa, gisulat ko lang ang akong igtatabi,” ni Alex. “Unsay imong teknik sa pagsulat?” ni Jomar. “Tabian kaayo ko kon dunay ka-estorya. Kon wa, gisulat ko lang ang akong igtatabi,”
“Unsay imong teknik sa pagsulat?” ni Jomar.
“Yano ra man. Gani, wa man gyud ko makadaog og ‘first prize’ sa tigi sa sinulatay. Dunay sinugdanan akong sugilanon, tunga-tunga ug katapusan,” ni Alex.
“Nganong daghan ka mang sinulat nga napublikar? Nauyonan gyud sa editor imong sinulat?”ni Jomar. “Natural. Way mapatik nga di mauyonan sa editor. Hinuon, aron daghan ang mapatik, mosulat sab kag daghan,” tubag ni Alex.
“Kakapoy sab ana, Tiyo,” ni Jomar. “Imo nang imahinasyon tanan? Bunga sa imong hunahuna?” Mitubag si Alex, “Diyes porsinto lang ang imahinasyon. Maglabi gyud ang base sa tinuod nga hitabo.”
“Mao ba? Asa man ka mamunit og tema?” ni Jomar. Misulti si Alex, “Una sa tanan ang pinakasayon, gikan sa imong nasayran o kasinatian. Ang uban gikan sa mga tsismis imong madunggan. Sa akong paglakaw-lakaw ngadto sa munisipyo, merkado, simbahan, buwangan, umahan, sanggotan o sa baybay, daghan kong nakita o nadunggan sa kalihukan sa tawo. Dungagan kini og diyutayng imahinasyon, sugilanon na!”
“Mao diayng daghan tang mga silingan nga moingon nga nanghilabot ka, Tiyo, sa ilang kinabuhi,” ni Jomar. Mitubag si Alex, “Problema na na nila. Ang mga tawo sa akong sugilanon laig mga ngan ug trabaho. Ang mga lugar lain sab og ngan. Di sila kaagrabyar. Moangkon diay sila sa ilang baho? Fiction baya akong gisulat o sugilanong di tinuod.”
“Maayo diay kang maniid, Tiyo,” ni Jomar. Gitan-aw ni Alex si Jomar ug miingon, “Kon tinuod gyud nga intresado kang mosulat, pagsugod na. Unya ipabasa nako kay tudloan tika unsaon pagnindot.” Unya nananghid si Jomar nga mopauli. (KATAPUSAN)