Aron makadaginot
KON ganahan na kaayo tag butang, di ta mahimutang. Mag-alindasay ka kay gusto ka nang makaangkon ani. Di ba? Mao ni ang rason nganong mausik ang imong kwarta. Busa, ayaw pagpadala sa imong gana kay mao nay makaingon nga mogasto ka og dako. Bitaw, biseklita ang akong gipasabot.
Aron di ka makagasto og dako sa imong pagpabarog og biseklita, ayaw pagpalit og brandnew. Go for second hand nga mga bike nga naa gipangbaligya sa internet. Naay daghan nga nindot na og mga dapat, almost katunga ang presyo kon imong itandi sa bike shops. Tuo lang kay kon bag-o ka pa sa biseklita, by impulse, mopalit ka dayon sa bikeshops kay nagtuo kang sakto na ni alang sa imoha.
Mao na ang akong pagtuo sa una. Dihang nag-anamanam lagi ko og kahibawo sa mga dapat sa biseklita, apil na ang brands, nadani ko sa pagupgrade. Nisaka ko ngadto sa Deore sa Shimano series kay nagsugod lang ko sa Altus ug Acera. Mauwaw ko mokuyog sa akong mga kauban nga ang mga dapat Deore ngadto na sa XTR sa Shimano series o uban pa nga brands ug models ang gamit.
Kon kanang gipamaligya sa bikeshops naggamit ana nga mga dapat, taga liog usab ang presyo. Busa, sa ako nang giingon, go for second hand mountain bikes kay mas makadaginot ka kay sagad upgraded na ang mga dapat. Bentaha Kon ang bike parts mga tulo ngadto sa lima pa lang ka buwan unya average user ang tag-iya, lig-on pa kaayo na. Gawas pa, lig-on ang mga dapat nga naa sa upper tier itandi sa mga baratuhon. Ang akong gamit nga kadena wa moubos og P450 kaniadto kay segurado kong lisod ni putlon. Kaluoy sa Ginuo, wa pa ko kasuway nga naputlan ko og kadena sa tanan nakong mga biyahe.
Kon dunay baligya nga P25,000 nga second hand nga biseklita, sagad sa mga dapat niana Shimano series na. Mahimo nang di ka na modiretso og upgrade, labaw na sa pag-ilis og frame nga usa sa mga importante sa biseklita ug status symbol kunohay sa bikers. Kon bag-o ka pa, di ka makarelate aning akong gisulti. Apan kon taudtaud na kang gasikad, mouyon gyud ka.
Pagsusi Kon duna kay mga higala nga nag-una, paminaw sa ilang tambag nimo. Seguradoha lang nga sama mo og discipline sa biseklita kay kini anha magagad sa mga klase sa dapat ug frame. Kanang hardtail, mao nang biseklita nga way shock ang frame. Ang dunay shock, mao ang all-mountain ug downhill. Lahi kining duha sa hardtail nga MTB.
Busa, managlahi usab ang ubang mga dapat ani nga mga biseklita. Kadaghanan sa cross country (XC) naggamit og hardtail, apan dunay uban nga mas pabor sa all-mountain kay sa rough nga mga agianan, di kaayo mauyog ang imong lawas, labina sa mga dulhugon ug libaungon nga mga agianan, labina kon naa mo mapidpid sa kadaruhan.
Karon, kon nagplano kang mopalit og biseklita, susiha sa Facebook kay naay daghang biseklitang for sale nga dako kaayo og gitibhang sa presyo. Seguradong makadaginot ka.