Let me be with you
NAKITA ko na sab si Remond nga nagsusapinday sa paglakaw sa iyang pagpauli. Hubog na sab siya. Sayo pa ang gabii. Naatol sab nga diha ko sa among terrace. Bungalow type ang among balay ug silingan ra namo sila si Remond. Ingon na gyud ani ang akong childhood friend sukad lang nga iyang nadeskubrehan nga dunay laing boyfriend ang iyang trato nga si Marlene.
Nanghupaw ko. Naluoy ko kang Remond. Sa iyang sulti nako, true love niya si Marlene. Ambot ba sab ni si Marlene, uy, nangita pa man gyud og laing lalaki nga buotan man unta si Remond ug nagmainud-anon niya.
Aw, wa tingali love si Marlene kang Remond. O kaha natental lang siya kang Ramir nga iyang klasmet. Suod man gud silang daan since sa among paghayskol. Usa ra ka eskuwelahan ang among gitunghaang upat sa among paghayskol. Mao bitaw nga nagkaila mi si Marlene ug Ramir. Ug karon third year college na mi pero sila si Marlene ug Ramir nagkauban sa usa ka university, samtang kami si Remond sa laing mga university nagtungha.
Ug sa kanunay tingali nilang panagkita ug pag-estoryahay sa eskuwelahan, na- develop ang ilang feeling sa usag usa. Ug karon, nagkahinigugmaay na sila.
Pagka ugma kay Sunday man, giadto ko si Remond sa ilang balay. Luya ug kapoy ang iyang hitsura nga miatubang nako. Bago pa siyang nagmata ug nagkalkag ang buhok. Wa pa siya makakaligo. Sa ilang lawn mi nag-estoryahay.
“Ingon ka na ba lang ani kanunay, Mond? Look, napasagdan na nimo ang imong kaugalingon?”
Tungod kay childhood friend man ming duha, wa ko managana sa pagpagawas sa akong hunahuna. “Klaro nga di tinud-anay ang love ni Marlene nimo, uy! You must to accept it. Pag-move on, Mond.” “Naglaom ko niya, Bea. Dako ang akong pagtuo nga gimahal gyud ko niya, that’s why nga naingon ko ani ron. Lisod para nako ang pagdawat sa iyang pagtraydor nako.”
Kahilakon si Remond. Nakapangawot ko sa akong ulo. Nasabtan ko kaayo siya pero di man sab maayo nga maingon lang gyud siya ani. Nabalaka ko nga basig mapasagdan niya ang iyang pag-eskuwela.
“Mao lagi, Mond. Pero hunahunaa sab ang imong kaugalingon labi na ang imong pag-eskuwela. Ang imong future ba.”
Nagpanglingo si Remond. Ug wa siyay tingog nga mibiya nako. Nakapanghupaw na lang ko, dayon kong pauli. Ngano ba sab, uy, nga si Marlene man ang iyang gihigugma?
(SUMPAYAN)