Tepora midominar
KATULO gitumba ni Filipino Jack Tepora ang Indonesian nga Galih Susanto sa iyang dominanteng 5th round TKO nga kadaugan aron angkunon ang bakanteng World Boxing Organization (WBO) Oriental super bantamweight title sa miaging gabii sa Mandaue City Sports & Cultural Complex.
Ang away maoy main event sa “Who’s Next 3” boxing event nga gipasiugdahan sa Omega ProSports International.
Human nag-estudyohay ang duha ka mga boksidor sa 1st round, si Tepora nagsunod pagkotrolar sa away sa 2nd round pinaagi sa iyang sunodsunod nga mga kumbinasyon.
Sa hinapos nga bahin sa 2nd round, nakapasulod og makusog nga walang kumo si Tepora nga maoy nagpabarag sa Indonesian.
Sa 5th round, hingpit nang midominar si Tepora ug iyang napatumba si Susanto sa ikaduhang higayon.
Nakabaro’g pa si Susanto apan gitiwasan kini’g kulata ni Tepora ug natumba na sab kini ug ning higayuna, giundang na sa referee ang away sa ika2:30 minutos sa round.
Si Tepora misaka sa 19-0, 14KOs nga rekord samtang si Susanto nahagbong sa 12-7-1, 2KOs nga baraha.
Sa top supporting bout, nadepensaan ni Kenny Demecillo ang iyang WBF Aspac bantamweight crown pinaagi sa desisyon nga kadaugan batok kang Jestoni Autida.
Sa lain pang away, si Christian Araneta miposte og 7th round knockout nga kadaugan batok kang Philip Luis Cuerdo.
Sa laing bahin, miresulta sa split draw ang away nila ni Jason Redondo batok Ryan Quimbo samtang ningdaog sila si Marjun Piencenaves batok Jesrel Corabal (KO 1), Filjun Taneo batok Frejun dela Cruz KO 4), Jay-Ar Aliasot batok Ronald Garcia (TKO 3), Tomjune Mangubat batok Michael Padayag (TKO 1) ug Jhaleel Payao batok Nicong Calamba (TKO2).