Amonsot mapasigarbuong nakabiya sa bisyo

MINNEAPOLIS - Mikumpisal si Australia-based born boxer Caesar “Czar of Bohol” Amonsot sa Sunstar Superbalita Cebu nga apil siya sa tigamitan og ginadiling drugas kaniadto.

Pinaagi sa chat online, gibutyag sa lumad nga taga Tagbilaran City, Bohol nagumon siya sa ginadiling drugas diin gikan sa labing barato ngadto sa labing mahal nga drugas iyang nasuwayan. Kini maoy hinungdan nga nahurot iyang kinitaan ug naguba pa iyang career sa boksing kaniadto.

Gisaysay ni Amonsot nga gikan sa Tagbilaran City ngadto sa Cebu hangtod na sa nasod sa Indonesia nakasuway gihapon siya sa pagsuyop og shabu.

Sa Australia nakasuway si Amonsot sa gidiling drugas makadiyot dihang naguol siya nga nagkabuwag sila sa iyang kapuyo nga inahan sa iyang anak nga lalake.

Dihang nakamata na siya sa kamatuoran ug nakita ni Amonsot nga wa’y padulngan kon siya magpadayon sa drugas, iyang giputol ang binuang nga bisyo kay nasuta niya nga may mga tawo na nga nadaot ang pangisip niini.

“Ako na natilawan tanan (drugas), but one day I realized I’m not happy of doing that anymore mao nangita kog paagi to get away from that certain person I used to hang out before kay I’m getting older na ug wa tay mahimo ana, proud ko kay nakahimo ko pagundang,” matod ni Amonsot.

Ang boksing maoy nakapabuhi sa iyang paglaom dihang gihatagan siya og away sa iyang manager mha si Brian Amatruda. Gawas niana gipapuyo pa siya sa balay niini sa Australia.

Gikan ato wa na patintal si Amonsot sa drugas ug matag adlaw kanunayan na ang Bol-anon sa gym aron mag-training uban sa iyang coach Rey Giles sanglit ang balay sa iyang manager may kaugalingon nga training facility sa sulod niini.

Maayo na ang dagan sa kinabuhi ni Amonsot dihang hingpit na siyang nakabiya sa drugas ug padayon siya sa paggukod sa iyang pangandoy nga makahimo og dakong pangalan sa natad sa boksing sa ugma damlag.

Si Amonsot, 31 anyos, kasamtangang rated WBA no. 7, (34-3-3, 21KO) ug bag-ong nakadepensa sa WBA Oceania Lighwelterweight belt. Iyang punterya ang pag challenge ni WBA king Ricky Burns.