Tokhang gigamit aron mangurakot?
DISMAYADO si Philippine National Police (PNP) Chief, Director General Ronald ‘Bato’ Dela Rosa sa taho nga gigamit ang Oplan Tokhang, nga gipuntariya unta batok sa mga suspetsado sa ilegal nga drugas, sa pangurakot sa pipila ka sakop sa kapulisan.
Unsa man diay ang nahitabo? Sa usa unta ka giingon nga legitimate police operation ubos sa Operation Tokhang, gikidnap sa mga pulis ang usa ka negusyanteng Koreano niadtong Biyernes aron pabayaron og ransom.
Nagpakita kini nga ang Oplan Tokhang naghatag lang og laing paagi sa mga kurakot nga pulis sa pagpadayon sa ilang pangurakot.
Si Jee Ickjoo, 53, gikatahong gikidnap sa grupo sa mga armadong tawo nga gipangulohan sa usa ka opisyal sa PNP AntiIllegal Drugs Group (AIDG) nga nipugos pagsulod sa iyang panimalay sa Angeles City didto sa Pampanga niadtong Oktubre 18, 2016.
Ang mga armadong tawo niingon nga kadto usa ka drug raid ubos sa PNP Oplan Tokhang.
Mao kini karon ang pangutana, ang pulis mao ang sigi og Tokhang, kinsa man ang motokhang sa mga kurakot nga pulis?
Si Director General Bato dela Rosa niingon nga gisakitan siya nga ang Tokhang gigamit sa mga pulis alang sa kidnap for ransom kay ang tokhang mao ang sentro sa kampanya batok sa ilegal nga drugas.
Matod pa ni Heneral Bato, nakamansa kini sa panlimbasog sa administrasyon ni Presidente Rody Duterte batok sa suliran sa illegal nga drugs sa atong nasud.
Nakamansa mo lang. Magkurog na karon ang mga adunahan kon tokhangon sa pul;is kay delikado nga makabayad silag ransom.
Kinahanglan nga gukdon sa pamunoan sa kapulisan ang mga pulis nga naghimo niini. Hayan nga moabot ang panahon nga wa nqay motuo sa kapulisan kay kurakuton man lang ang maigo sa Tokhang.
Si Presidente Rody Duterte seryuso sa iyang kampanya batok sa illegal nga drugas. Gani iya mang giwarningan ang mga mayor nga iyang patyon o ipapusil sa ilang mga hepe sa kapulisan kon ugaling nalamabigit sila sa illegal nga drugas.
Hatagan ni Duterte og pardon ang mga pulis nga makonbikto tungod sa pagpatay sa mga suspetsado sa ilegal nga drugs. Apan unsa man ang iyang buhaton sa mga pulis nga nahilambigit sa tokhang for ransom?